شہباز شریف سے بلاول بھٹو کی قیادت میں پیپلز پارٹی کے وفد کی ملاقات

اسلام آباد: پاکستان پیپلزپارٹی (پی پی پی) کے چیئرمین بلاول  بھٹو کی سربراہی میں وفد نے وزیراعظم شہباز شریف  سے ملاقات کی اور حکومت کی معاشی پالیسیوں کی تعریف کی ہے۔

ذرائع کےمطابق وزیر اعظم شہباز شریف سے پاکستان پیپلز پارٹی کے وفد میں سید نوید قمر اور مئیر کراچی مرتضی وہاب شامل تھے۔جبکہ ن لیگ کی جانب سے ملاقات میں نائب وزیر اعظم اسحاق ڈار، وزیر قانون اعظم نذیر تارڑ، وزیرِ اطلاعات عطا اللہ تارڑ اور اٹارنی جنرل بھی شریک ہوئے۔

ملاقات میں ملک کی موجودہ سیاسی صورت حال پر مشاورت کی گئی۔

وزیراعظم نے شرکا سے گفتگو کرتے ہوئے کہا کہ پاکستان پیپلز پارٹی حکومت کی اہم اتحادی جماعت ہے، پی پی پی نے ملکی معیشت کے استحکام کیلئے حکومت کا ہر قدم  پرساتھ دیا۔

وزیر اعظم نے بلاول بھٹو زرداری کی پارلیمنٹ میں دی گئی تجویز ’’چارٹرآف پارلیمنٹ‘‘ کو سراہا اور اس تجویز کی حمایت کرتے ہوئے کہا کہ اس سے جمہوریت اور پارلیمنٹ مزید مضبوط ہو گی۔

پاکستان پیپلز پارٹی کے وفد نے ملکی معیشت کے استحکام کیلئے حکومتی معاشی پالیسیوں کی تعریف کی جبکہ مکمل اعتماد کا اظہار کیا جس کا شہباز شریف نے خیر مقدم کیا۔