میڈیا ریونیو میں اضافے سے متعلق ٹوئٹ ‘فیک نیوز ‘قرار دینے پر فواد چوہدری کا ردِ عمل

اسلام آباد:وفاقی وزیر اطلاعات فواد چوہدری کا میڈیا ایسی ایشنز  کی  جانب سے  پاکستان میں میڈیا کے ریونیو میں 2018 سے 2021 کے دوران  600 فیصد تک اضافے کے ٹوئٹ کو ‘فیک نیوز’ قرار دینے پر  ردِ عمل آگیا۔

فواد چوہدری نے اپنا ردِ عمل دیتے ہوئے کہا ہے کہ ہو سکتا ہے ان کی بات درست ہو اور  اعداو شمار غلط ہوں لیکن اس کو غلط ثابت کرنے کیلئے ضروری ہے کہ اپنے اکاؤنٹس اوپن کریں

میڈیا مالکان کہ رہے ہیں کہ میڈیا ریونیو میں 600 گنا اضافہ نہیں ہوا،ہو سکتا ہے ان کی بات درست ہو اور Aurora کے اعداو شمار غلط ہوں لیکن اس کو غلط ثابت کرنے کیلئے ضروری ہے کہ میڈیا گروپس اپنے اکاؤنٹس اوپن کریں تاکہ میڈیا ورکرز اپنے اداروں کی آمدنی اور اخراجات دیکھ سکیں

— Ch Fawad Hussain (@fawadchaudhry) January 18, 2022

قبل ازیں فواد چوہدری کے  گزشتہ روز  پاکستان میں میڈیا ریونیو  میں اضافے سے متعلق ٹوئٹ پر پاکستان نیوز پیپر سوسائیٹی ( اے پی این ایس)، کونسل آف پاکستان نیوز پیپر ایڈیٹرز( سی پی این ای) اور پاکستان براڈ کاسٹرز ایسوسی ایشن (پی بی اے) کی جانب سے مشترکہ بیان جاری کیا تھا، جس میں  وفاقی وزیر کے ٹوئٹ کو  کو بے بنیاد اور فیک نیوز قرار دیا گیا تھا۔

واضح رہے کہ گزشتہ روز  فواد چوہدری نے ٹوئٹ کرتے ہوئے کہا تھا  کہ پاکستان میڈیا کے ریونیو میں 2018 سے 2021 تک 600 فیصد تک کا اضافہ ہوا ہے جو میڈیا انڈسٹری کیلئے انتہائی خوش آئند بات ہے ۔

فواد چوہدری نے اپنے ٹوئٹ میں کہا کہ میڈیا کے ریونیو میں اضافہ خوش آئند ہے ،وزیر اطلاعات کا کہنا تھا کہ معیشت مستحکم نہ ہو تو اشتہارات میں اتنا اضافہ کیسے ممکن ہے؟

پاکستان میڈیا کے ریونیو میں 2018 سے 2021 میں 600 فیصد اضافہ ہوا ہے ، یہ خوش آئند بات ہے لیکن سوال یہ ہے اگر معیشت مستحکم نہ ہو تو اشتہارات میں اتنا اضافہ کیسے ممکن ہے؟ ذرا سوچئے اور خدا کیلئے میڈیا ورکرز کی تنخواہوں میں اضافہ کریں تا کہ انھیں بھی مہنگائ کا اثر کم لگنا شروع ہو pic.twitter.com/cRzeyMD672

— Ch Fawad Hussain (@fawadchaudhry) January 17, 2022