گورنر پنجاب کی برطرفی، سابق وزیراعلیٰ پنجاب عثمان بزدار کا موقف بھی آ گیا

لاہور: سابق وزیراعلیٰ پنجاب عثمان بزدار نے کہا ہے کہ گورنر پنجاب عمر سرفراز چیمہ نے آئینی ذمہ داریاں پوری کرتے ہوئے اسمبلی پر دھاوا بولنے والے بد معاش مافیا کا راستہ روکا۔
تفصیلات کے مطابق سردار عثمان بزدار نے گورنر پنجاب کو ہٹائے جانے کی مخالفت کی اور سماجی رابطوں کی ویب سائٹ ٹوئٹر پر جاری اپنے پیغام میں لکھا ’غیر آئینی طریقے سے گورنر پنجاب عمر چیمہ کو برطرف کرنے کے اقدام کو مسترد کرتے ہیں۔‘ 

غیر آئینی طریقے سے گورنر پنجاب عمر چیمہ کو برطرف کرنے کے اقدام کو مسترد کرتے ہیں۔ #امپورٹڈ__حکومت__نامنظور

— Usman Buzdar (@UsmanAKBuzdar) May 10, 2022

واضح رہے کہ وفاقی حکومت نے گورنر پنجاب عمر سرفراز چیمہ کو عہدے سے ہٹا دیا ہے اور کابینہ ڈویژن نے اس ضمن میں نوٹیفکیشن بھی جاری کر دیا ہے جبکہ نئے گورنر کی تعیناتی تک سپیکر پنجاب اسمبلی چوہدری پرویز الٰہی قائم مقام گورنر رہیں گے۔ 
وفاقی حکومت نے 17 اپریل کو گورنر پنجاب عمر سرفراز چیمہ کو ہٹانے کی سمری صدر مملکت کو بھیجی تھی جسے مسترد کر دیا گیا تھا تاہم سمری کی آئینی مدت مکمل ہونے کے بعد کابینہ ڈویژن نے عمر چیمہ کی برطرفی کا نوٹیفکیشن جاری کر دیا ہے۔ 
دوسری جانب سابق گورنر پنجاب عمر سرفراز چیمہ کا کہنا ہے کہ صدر مملکت عارف علوی کی جانب سے سمری مسترد ہونے کے باوجود عہدے سے ہٹانے کا غیر آئینی نوٹیفیکیشن مسترد کرتا ہوں۔ آئینی ماہرین سے مشاورت جاری ہے اور جلد آئندہ کا لائحہ عمل کا اعلان کروں گا۔