وزیراعظم شہباز شریف کی کاوشوں سے شام میں پھنسے 318 پاکستانی وطن واپس پہنچ گئے

اسلام آباد: وزیراعظم شہباز شریف کی کوششوں کے نتیجے میں شام میں پھنسے 318 پاکستانیوں کی وطن واپسی ممکن ہو گئی۔ ان پاکستانیوں کو بیروت سے ایک خصوصی طیارے کے ذریعے اسلام آباد لایا گیا، جہاں وفاقی وزیر احسن اقبال اور دیگر حکومتی نمائندوں نے ان کا استقبال کیا اور ان کی خیریت دریافت کی۔ اس موقع پر پاکستانیوں کو خوش آمدید کہتے ہوئے گلدستے بھی پیش کیے گئے۔

شام میں جاری کشیدہ صورتحال کے باعث پاکستانی شہری وہاں پھنس گئے تھے، تاہم وزیراعظم شہباز شریف نے لبنان کے ہم منصب سے رابطہ کر کے ان پاکستانیوں کی واپسی کی راہ ہموار کی۔

وفاقی وزیر احسن اقبال نے میڈیا سے گفتگو کرتے ہوئے کہا کہ "دنیا کے کسی بھی کونے میں اگر کوئی پاکستانی ہوگا، وہ اکیلا نہیں ہوگا، ہم سب ایک قوم ہیں، اور ہمارے دکھ سکھ مشترک ہیں۔” انہوں نے لبنانی وزیراعظم کا شکریہ ادا کیا اور کہا کہ ان کی مدد کے بغیر پاکستانیوں کی واپسی ممکن نہیں تھی۔