صنعتوں کو کل سے گیس سپلائی بحال ہو جائے گی، عبدالرزاق داؤد

اسلام آباد: آل پاکستان ٹیکسٹائل ملز ایسوسی ایشن (اپٹما) کے وفد نے مشیر برائے تجارت عبدالرزاق داؤد سے ملاقات کی۔ ملاقات میں کہا گیا کہ 29 دسمبر سے صنعتوں کو 75 ایم ایم سی ایف یومیہ گیس سپلائی بحال ہو گی۔

مشیر برائے تجارت عبدالرزاق داؤد سے آل پاکستان ٹیکسٹائل ملز ایسوسی ایشن (اپٹما) کے وفد کی ملاقات ہوئی۔ ملاقات کے بعد اپٹما کا کہنا تھا کہ 29 دسمبر سے صنعتوں کو 75 ایم ایم سی ایف یومیہ گیس سپلائی بحال ہو گی اور حکومت نے برآمدات میں اضافہ برقرار رکھنے کے لیے گیس کی فراہمی پر اتفاق کیا۔

اپٹما کے مطابق ایکسپورٹ سیکٹر کو گیس سپلائی مزید بڑھانے کے لیے کوششیں کی جائیں گی، اقدامات سے صنعت کو 21 بلین ڈالر برآمدی ہدف پورا کرنے میں مدد ملے گی۔

وفد کا کہنا تھا کہ وزیر خزانہ شوکت ترین سے بھی ملاقات کی گئی جس میں مناسب گیس فراہمی اور ورکنگ کیپٹل کی واپسی کے طریقہ کار میں نرمی کا یقین دلایا گیا۔

اپٹما کے مطابق شوکت ترین نے تجویز دی کہ صنعت کار کو 7 دن کے اندر رقم کی واپسی ہو سکتی ہے، ایف بی آر 7 دن میں جواب نہیں دیتا تو صنعت واپسی میں ایڈجسٹ کی حقدار ہو گی۔