نیوزی لینڈ کیخلاف شاندار کارکردگی دکھانے والے آصف علی کی جیت کے بعد سوشل میڈیا پر پہلی پوسٹ کیا ہے؟

لاہور: انٹرنیشنل کرکٹ کونسل (آئی سی سی) ٹی 20 ورلڈکپ کے سپر 12 مرحلے میں نیوزی لینڈ کے خلاف میچ میں سنسنی خیز مقابلے کے بعد فتح کے حصول میں کلیدی کردار ادا کرنے والے آصف علی نے پہلی پوسٹ سوشل میڈیا پر شیئر کی ہے۔
آصف علی نے اپنے تصدیق شدہ انسٹاگرام اکاؤنٹ پر گزشتہ روز پاکستان اور نیوزی لینڈ کے درمیان کھیلے گئے میچ کے دوران لی گئی 2 تصاویر شیئر کیں اور کیپشن میں لکھا ’الحمد اللہ۔‘
آصف علی کی جانب سے شیئر کی گئی تصاویر میں پہلی تصویر وہ ہے جب آصف علی نے مشکل وقت میں زبردست چھکا لگا کر پاکستان کی جیت کو یقینی بنایا جبکہ دوسری تصویر میں وہ مین آف دی میچ قرار پانے والے حارث رؤف کیساتھ کھڑے ہیں۔

واضح رہے کہ آئی سی سی ٹی 20 ورلڈکپ میں پاکستان کی عمدہ کارکردگی کا سلسلہ جاری ہے جس نے پہلے میچ میں بھارت کو تاریخی شکست سے دوچار کیا تو دوسرے میچ میں نیوزی لینڈ جیسی بہترین ٹیم کو سنسنی خیز مقابلے کے بعد دھول چٹائی۔
شارجہ کرکٹ گراؤنڈ میں کھیلے گئے میچ میں پاکستان نے ٹاس جیت کر نیوزی لینڈ کو بیٹنگ کی دعوت دی جس نے مقررہ 20 اوورز میں 8 وکٹوں کے نقصان پر 134 رنز بنائے تھے جبکہ قومی ٹیم نے مقررہ ہدف سنسنی خیز مقابلے کے بعد 5 وکٹوں کے نقصان پر حاصل کر لیا۔