اسرائیل اور حزب اللہ کے درمیان جنگ بندی کا امکان

لبنان : اسرائیل اور لبنان کی مزاحمتی تنظیم حزب اللہ کے درمیان جنگ بندی کا معاہدہ طے پانے کا امکان ہے۔ وائٹ ہاؤس کے ترجمان جان کربی نے کہا کہ اسرائیل اور حزب اللہ کے درمیان جنگ بندی کے حوالے سے مذاکرات صحیح سمت میں آگے بڑھے۔

اسی طرح، فرانسیسی صدر کے دفتر کی جانب سے بھی بیان میں کہا گیا کہ لبنان میں جنگ بندی پر بات چیت میں مثبت پیشرفت ہوئی اور مذاکرات کامیاب رہے۔

اس کے باوجود، جنوبی لبنان پر اسرائیل کے حملے جاری ہیں، جن میں آج 12 سے زائد افراد کی شہادت کی اطلاعات ہیں۔ غزہ میں اسرائیلی بمباری بھی جاری ہے، جس میں گزشتہ 24 گھنٹوں میں 30 سے زیادہ فلسطینی شہید ہو چکے ہیں۔

رفح میں حماس کے راکٹ حملے میں اسرائیلی فوجی گاڑی کو نشانہ بنایا گیا، جس کے نتیجے میں کئی اسرائیلی فوجیوں کی ہلاکت کی خبریں ہیں۔ غزہ میں موسم سرما کی بارشوں کے بعد پانچ لاکھ افراد کے متاثر ہونے کا خدشہ بھی ظاہر کیا جا رہا ہے۔