دنیا میں کوئی بھی شخص مکمل طور پرسیلف میڈ‘ نہیں ہوتا: ماہرہ خان

کراچی: پاکستان کی معروف اداکارہ ماہرہ خان نے کہا ہے کہ ان کے مطابق دنیا میں کوئی بھی شخص مکمل طور پر "سیلف میڈ” نہیں ہوتا، کیونکہ کامیابی ہمیشہ کسی نہ کسی کی مدد سے ممکن ہوتی ہے۔ ماہرہ خان کی یہ بات ایک وائرل ویڈیو میں سامنے آئی، جس میں انہوں نے ’سیلف میڈ‘ ہونے کے تصور کو مسترد کیا اور اس بات پر زور دیا کہ کامیاب افراد ہمیشہ اپنے خاندان اور دوستوں کی مدد سے ترقی کرتے ہیں۔

ماہرہ خان سے ایک تقریب کے دوران سوال کیا گیا کہ انہوں نے اپنے خطاب میں خاندان اور دوستوں کے تعاون کو اہمیت دی تھی، جس پر انہوں نے کہا: "سیلف میڈ ہونا صرف ایک لفظ ہے، لیکن حقیقت میں ایسا کچھ نہیں ہوتا۔ یہ لفظ کہنے میں اچھا لگتا ہے، مگر اس کا حقیقت سے کوئی تعلق نہیں ہے۔”

اداکارہ نے مزید کہا کہ ان کی موجودہ کامیابی ان کے والدین، بھائی، بیٹے اور دوستوں کی مدد سے ممکن ہوئی ہے۔ ان کے مطابق، یہ صرف ذاتی محنت نہیں ہے بلکہ اُن افراد کا تعاون بھی ہے جن کے ساتھ انہوں نے کام کیا اور جو نئے ساتھی ان کی زندگی میں شامل ہوئے۔

ماہرہ خان نے واضح کیا کہ ’’سیلف میڈ‘‘ ہونے کا دعویٰ ایک غلط فہمی ہے، اور کوئی بھی شخص اپنی محنت کے ساتھ ساتھ دوسروں کی مدد کے بغیر کامیاب نہیں ہو سکتا۔ انہوں نے اس بات پر زور دیا کہ کامیابی کے سفر میں ہمیشہ دوسروں کا اہم کردار ہوتا ہے۔

ماہرہ خان کے اس بیان نے سوشل میڈیا پر خاصی توجہ حاصل کی ہے اور ان کے مداحوں نے ان کے خیالات کی بھرپور حمایت کی ہے، جبکہ کچھ صارفین نے اس پر اپنی رائے بھی دی ہے۔