پاکستان میں پولیو کا نیا کیس رپورٹ

ڈی آئی خان: پاکستان میں پولیو کا ایک اور کیس رپورٹ ہوا ہے، جس کے بعد رواں سال ملک بھر میں پولیو کیسز کی تعداد 48 ہو گئی ہے۔ نیشنل ایمرجنسی آپریشنز سینٹر (این ای او سی) نے تصدیق کی ہے کہ خیبر پختونخوا کے ضلع ڈیرہ اسماعیل خان میں 28 ماہ کے ایک بچے میں پولیو وائرس کی موجودگی پائی گئی ہے۔

پولیو وائرس کی نوعیت کی تصدیق کرنے والی لیبارٹری نے ‘ڈبلیو پی وی ون’ (Wild Polio Virus Type 1) وائرس کی موجودگی کی تصدیق کی ہے۔ یہ کیس ڈیرہ اسماعیل خان سے رپورٹ ہونے والا پولیو کا تیسرا کیس ہے، جو جنوبی خیبر پختونخوا کے پولیو سے متاثرہ علاقوں میں شامل ہے۔

این ای او سی کے حکام کے مطابق، بچے سے حاصل کیے گئے نمونوں کی جینیاتی تشخیص کا عمل جاری ہے تاکہ وائرس کے مزید پھیلاؤ کا جائزہ لیا جا سکے۔ حکام کا کہنا ہے کہ اس سال پاکستان میں پولیو کے کیسز کی مجموعی تعداد 48 ہو چکی ہے۔

بلوچستان سے 23، سندھ سے 13، خیبر پختونخوا سے 10، اور پنجاب و اسلام آباد سے ایک ایک پولیو کیس رپورٹ ہوا ۔ اس کے علاوہ، سندھ کے ضلع گھوٹکی سے گزشتہ روز پولیو کا پہلا کیس رپورٹ ہوا تھا۔

پولیو کے کیسز میں اضافے نے ایک بار پھر اس بات کی اہمیت کو اجاگر کیا ہے کہ پولیو کے خاتمے کے لیے مزید موثر اقدامات کی ضرورت ہے۔ حکومت پاکستان کی جانب سے پولیو کے خاتمے کے لیے متعدد اقدامات کیے جا رہے ہیں، لیکن ان کیسز کے سامنے آنے سے یہ بات واضح ہو رہی ہے کہ پولیو کا خطرہ ابھی بھی برقرار ہے۔