لاہور:ایجوکیشن ریفارمز بارے 5سالہ پلان کا شیڈول طلب کرلیاگیاہے۔ وزیراعلیٰ پنجاب مریم نواز نے ایجوکیشن ریفارمز سے متعلق 5 سالہ پلان کا ماہانہ شیڈول طلب کیا ہے۔
وزیراعلیٰ پنجاب مریم نواز کی زیر صدارت سکول ایجوکیشن ریفامز سے متعلق خصوصی اجلاس ہوا جس میں سینیٹر پرویز رشید ،صوبائی وزراء مریم اورنگزیب، راناسکندر حیات، ایم پی اے ثانیہ عاشق، چیف سیکرٹری، سیکرٹری ایجوکیشن اور دیگر متعلقہ حکام شریک ہوئے۔
اجلاس میں سرکاری سکولوں کے تین لاکھ بچوں کو گوگل سرٹیفکیشن کے لئے معاہدے کی اصولی منظوری بھی دے دی گئی، ڈیجیٹل سفر برائے ٹیک ویلی پراجیکٹ کے تحت طلبہ کو گوگل سرٹیفکیشن کے مواقع ملیں گے۔اجلاس میں پنجاب ایجوکیشن کریکولم اینڈ ٹریننگ کے قیام کی تجاویز اور سفارشات کا بھی جائزہ لیا گیا جبکہ اس حوالے سے بریفنگ میں بتایا گیا کہ 92 فیصد سے زائد مفت کتابیں ڈیلیور کی جاچکی ہیں ۔
اجلاس میں پبلک سکول ری آرگنائزیشن پروگرام کا تفصیلی جائزہ لیا گیا جبکہ سیکرٹری سکول ایجوکیشن نے سکول نیوٹریشن پراجیکٹ پر پیش رفت سے وزیراعلیٰ کو آگاہ کیا، مریم نواز نےایجوکیشن ریفارمز کے پانچ سالہ پلان کا ماہانہ شیڈول طلب کرلیا۔
دوران اجلاس وزیراعلیٰ مریم نواز نے پرائمری سکول ہیڈز کو 32 ہزار 298 کمپیوٹر ٹیب دینے کی منظوری دیدی جبکہ ایک ہزار ایلیمنٹری سکولوں میں آئی ٹی اینڈ سائنس لیب قائم کرنے پر اتفاق ہوا،ایشیائی ترقیاتی بینک لیب کے قیام کے لئے 100ملین ڈالر کی مالی معاونت کرے گا۔
اجلاس کے شرکاء سے گفتگو کرتے ہوئے وزیراعلیٰ پنجاب مریم نواز کا کہنا تھا کہ سرکاری سکولوں میں کوالٹی آف ایجوکیشن کوہر صورت بہتر کرنا ہے۔
تبصرے بند ہیں.