ڈانس کا شوق ہے، گلوکاری میں دلچسپی نہیں: آمنہ الیاس

لاہور: پاکستانی شوبز انڈسٹری کی معروف اداکارہ اور ماڈل آمنہ الیاس نے کہا ہے کہ انہیں ڈانس کا شوق ہے، تاہم وہ گلوکاری میں دلچسپی نہیں رکھتیں۔

حال ہی میں آمنہ الیاس ایک نجی ٹی وی شو میں بطور مہمان شریک ہوئیں، جہاں انہوں نے اپنے شوبز کیریئر اور مختلف موضوعات پر کھل کر گفتگو کی۔

شوبز کیریئر کے حوالے سے آمنہ نے بتایا کہ فیشن انڈسٹری میں کام کرنے کے بعد 2013 میں انہوں نے فلم انڈسٹری میں قدم رکھا۔ انہوں نے کہا کہ فلموں میں کام حاصل کرنے کے لیے ہمیشہ آڈیشن دیے اور اپنی محنت اور اداکاری کی بدولت یہ کامیابیاں حاصل کیں۔

آمنہ الیاس نے اپنے ماڈلنگ کیریئر کے آغاز کے بارے میں بات کرتے ہوئے کہا کہ ان کی بہنیں سلمیٰ اور عظمیٰ الیاس دونوں ماڈلنگ کرتی تھیں اور اپنے دور کی مشہور ماڈلز تھیں، جبکہ ان کے ایک اور رشتہ دار بھی فیشن انڈسٹری سے وابستہ تھے، جس کی وجہ سے انہیں ماڈلنگ کی دنیا میں قدم جمانے میں کوئی مشکلات پیش نہیں آئیں۔

اداکارہ نے کہا کہ انہوں نے زیادہ تر فیشن شوٹس کیے ہیں اور یورپ، مشرق وسطیٰ اور دیگر خطوں میں جا کر فیشن شوٹس کروائے۔ ان کا کہنا تھا کہ ماڈلنگ سے ان کا تعلق وقت کے ساتھ مزید گہرا ہوا اور انہیں اس شعبے سے محبت ہو گئی۔

ماڈلز کی فٹنس کے بارے میں آمنہ نے کہا کہ ماڈلز کو اپنے کیریئر کے دوران صحت اور جسامت کے حوالے سے سمجھوتہ نہیں کرنا چاہیے، بلکہ انہیں اپنی فٹنس اور تندرستی کا بھرپور خیال رکھنا چاہیے۔