وٹس ایپ کا نیا ڈرافٹ فیچر متعارف، پیغامات بھیجنے کا طریقہ مزید آسان

کیلیفورنیا: وٹس ایپ نے اپنے صارفین کے لیے نیا ڈرافٹ فیچر متعارف کرایا ہے، جس کا مقصد اُن پیغامات کو دوبارہ تلاش کرنا اور مکمل کر کے بھیجنا ہے جو کسی وجہ سے بھیجے نہیں جا سکے۔ اس فیچر کے ذریعے صارفین آسانی سے ان پیغامات تک رسائی حاصل کر سکیں گے جو انہوں نے ٹائپ تو کر لیے تھے لیکن کسی وجہ سے سینڈ نہیں کر پائے۔

میٹا کے چیف ایگزیکٹو مارک زکربرگ نے اس فیچر کا اعلان کرتے ہوئے کہا کہ "یہ فیچر تمام صارفین کے لیے بہت مفید ثابت ہوگا”، اور اس بات کا عندیہ دیا کہ یہ فیچر دنیا بھر میں اینڈرائیڈ اور آئی او ایس دونوں ڈیوائسز پر دستیاب ہو گا۔

یہ فیچر خاص طور پر اُس صورت میں فائدہ مند ہے جب صارفین کسی کام میں مصروف ہو جائیں یا سینڈ بٹن دبانا بھول جائیں۔ اس کی مدد سے، وہ اپنے نامکمل پیغامات کو فوری طور پر تلاش کر کے دوبارہ بھیج سکیں گے، اور ان پیغامات کو تلاش کرنے میں وقت ضائع نہیں ہو گا۔

اس فیچر کو استعمال کرنا بہت آسان ہے۔ جب آپ وٹس ایپ کھولیں گے اور اگر آپ کے کسی چیٹ میں ڈرافٹ پیغام موجود ہوگا، تو وہ چیٹ اوپر کی جانب نظر آئے گی جس پر "ڈرافٹ” کا نشان ہوگا۔ آپ اسے کھول کر پیغام مکمل کر کے فوراً سینڈ کر سکیں گے۔

وٹس ایپ کا یہ نیا فیچر پیغامات بھیجنے کے عمل کو مزید آسان، مؤثر اور تیز بناتا ہے، اور صارفین کو ان کے پیغامات کے سلسلے میں کسی بھی پریشانی سے بچاتا ہے۔