سونی کا پلے اسٹیشن پورٹل میں کلاؤڈ اسٹریمنگ متعارف

ٹوکیو: گیمز کے شوقین افراد کے لیے خوشخبری، سونی نے پلے اسٹیشن پورٹل میں پہلی بار کلاؤڈ اسٹریمنگ کا فیچر متعارف کروا دیا۔ اس جدید سہولت کے ذریعے صارفین اب پلے اسٹیشن پلس گیم کیٹلاگ سے منتخب PS5 گیمز کو براہ راست اپنے پلے اسٹیشن پورٹل پر اسٹریم کر سکیں گے۔

یہ فیچر ابتدائی طور پر بیٹا ورژن کے طور پر متعارف کرایا گیا ہے اور یہ آسٹریا، بیلجیم، بلغاریہ، کینیڈا، جاپان، امریکہ، برطانیہ، اور یورپ کے کئی ممالک میں دستیاب ہوگا۔

اس سہولت سے فائدہ اٹھانے کے لیے صارفین کو پلے اسٹیشن پلس پریمیم سبسکرپشن کی ضرورت ہوگی۔
بہتر تجربے کے لیے 720p اسٹریمنگ کے لیے کم از کم 7 Mbps اور 1080p کے لیے 13 Mbps کی انٹرنیٹ رفتار درکار ہوگی۔

چند فیچرز اس اپ ڈیٹ کے ساتھ دستیاب نہیں ہوں گے، جن میں گیم ٹرائلز، پارٹی وائس چیٹ، 3D آڈیو، اور "ان گیم کامرس” شامل ہیں۔ مزید یہ کہ PS4 اور PS3 گیمز کو اسٹریم نہیں کیا جا سکے گا، جبکہ چائلڈ اکاؤنٹس اس سہولت کا استعمال نہیں کر سکیں گے۔

نئے فیچر کے ساتھ، سونی نے پلے اسٹیشن پورٹل کی آڈیو سیٹنگز کو بھی اپ گریڈ کیا ہے، جس میں کم از کم والیوم لیول اور سیٹنگز کو زیادہ آسانی سے کنٹرول کرنے کی صلاحیت شامل ہے۔

یاد رہے کہ سونی نے پچھلے سال PS5 کنسولز پر کلاؤڈ اسٹریمنگ کی سہولت شروع کی تھی، اور یہ نیا اقدام کلاؤڈ گیمنگ کی دنیا میں کمپنی کی موجودگی کو مزید مضبوط کرنے کی ایک اہم کوشش ہے۔