پاکستانی پاسپورٹ کی عالمی رینکنگ میں مزید تنزلی، 102ویں نمبر پر پہنچ گیا

اسلام آباد : پاکستانی پاسپورٹ کی عالمی رینکنگ میں کمی آئی ہے اور اب یہ 102ویں نمبر پر آ گیا ہے۔

یہ رینکنگ عالمی ادارے ہینلے اینڈ پارٹنرز کی حالیہ رپورٹ میں سامنے آئی ہے، جس کے مطابق پاکستانی پاسپورٹ دیگر کئی ممالک جیسے صومالیہ، یمن، بنگلہ دیش، ایتھوپیا اور لیبیا سے بھی نیچے جا پہنچا ہے، جنہیں 101ویں نمبر پر رکھا گیا ہے۔

رپورٹ کے مطابق ان ممالک کے شہری 38 ممالک کا سفر بغیر ویزا کر سکتے ہیں، جبکہ پاکستانی پاسپورٹ رکھنے والوں کو صرف 34 ممالک کا ویزا فری سفر ملتا ہے۔ گزشتہ سال پاکستان کا پاسپورٹ 92ویں نمبر پر تھا، مگر اب یہ مزید نیچے گر کر 102ویں نمبر پر آ گیا ہے، جو کہ ایک بڑی تنزلی ہے۔

سب سے کمزور پاسپورٹ افغانستان کا ہے، جس کے شہری صرف 28 ممالک کا سفر بغیر ویزا کر سکتے ہیں۔ اس کے برعکس، سنگاپور کا پاسپورٹ دنیا کا سب سے طاقتور پاسپورٹ ہے، جس کے شہری 195 ممالک کا سفر بغیر ویزا کر سکتے ہیں۔

رینکنگ میں دوسرے نمبر پر فرانس، جرمنی، جاپان، اٹلی اور اسپین جیسے ممالک ہیں، جبکہ تیسرے نمبر پر آسٹریا، فن لینڈ، نیدرلینڈز اور جنوبی کوریا جیسے ممالک شامل ہیں۔ چوتھے نمبر پر برطانیہ، سوئٹزرلینڈ، نیوزی لینڈ اور دیگر ترقی یافتہ ممالک کا پاسپورٹ ہے۔