محکمہ موسمیات کی مختلف علاقوں بارش اور برفباری کی پیشگوئی

لاہور : محکمہ موسمیات نے آئندہ دنوں میں ملک کے مختلف علاقوں کے موسم کے بارے میں پیشگوئی کی ہے، جس کے مطابق زیادہ تر علاقوں میں موسم خشک رہے گا، تاہم پہاڑی علاقوں میں سردی میں اضافہ اور ہلکی برفباری کی توقع ہے۔

پنجاب اور خیبرپختونخوا کے میدانی علاقوں میں سموگ کا سامنا رہے گا، اور صبح و رات کے اوقات میں شدید دھند پڑنے کا امکان ہے۔ اسلام آباد اور اس کے گرد و نواح میں بھی موسم خشک رہے گا، تاہم سموگ اور دھند چھا سکتی ہے۔ بلوچستان کے بیشتر علاقوں میں موسم خشک رہے گا، جبکہ پہاڑی علاقوں میں سردی بڑھنے کی توقع ہے۔

پنجاب کے بڑے شہروں جیسے لاہور، فیصل آباد، ملتان اور دیگر علاقوں میں صبح و شام کے اوقات میں سموگ چھا سکتی ہے اور دھند کا امکان ہے۔ سندھ کے کچھ حصوں جیسے سکھر، لاڑکانہ اور خیر پور میں بھی صبح اور رات کے وقت دھند چھا سکتی ہے۔

خیبرپختونخوا کے بالائی اضلاع میں سرد موسم رہنے کا امکان ہے، اور میدانی علاقوں جیسے پشاور، مردان، بنوں وغیرہ میں سموگ اور دھند ہو سکتی ہے۔ کشمیر میں موسم سرد اور جزوی طور پر ابر آلود رہے گا، جبکہ گلگت بلتستان میں بارش اور پہاڑوں پر ہلکی برفباری کی پیشگوئی کی گئی ہے۔