سدھو موسے والا کے چھوٹے بھائی کی تصویر نے سوشل میڈیا پر ہلچل مچا دی

ممبئی: بھارت کے مشہور پنجابی گلوکار سدھو موسے والا کے چھوٹے بھائی کی ایک تصویر سوشل میڈیا پر تیزی سے وائرل ہو گئی ہے۔ گلوکار کے والدین، بلکور سنگھ اور چرن کور، نے اپنے بیٹے شبھدیپ موسے والا کی ایک خوبصورت ویڈیو اور تصویر سدھو کے آفیشل انسٹاگرام اکاؤنٹ پر شیئر کی ہے۔

ویڈیو میں شبھدیپ موسے والا گلابی رنگ کی پگڑی پہنے اپنے والد کی گود میں بیٹھا نظر آ رہا ہے، جبکہ والدہ بھی ان کے قریب بیٹھی ہیں۔ اس ویڈیو میں سدھو موسے والا کی بچپن کی کچھ دلکش تصاویر بھی شامل کی گئی ہیں، جنہوں نے مداحوں کو جذباتی کر دیا۔

سوشل میڈیا پر یہ ویڈیو اور تصویر تیزی سے مقبول ہو رہی ہے، اور مداح شبھدیپ کو سدھو موسے والا کا ہمشکل قرار دے رہے ہیں۔ صارفین نے شبھدیپ کی شکل و صورت پر تبصرے کرتے ہوئے کہا کہ وہ سدھو موسے والا کی "کاربن کاپی” ہیں۔

یاد رہے کہ 2022 میں سدھو موسے والا کو ان کی گاڑی پر حملہ کر کے گولیاں مار کر قتل کر دیا گیا تھا، جس کی ذمہ داری بدنام زمانہ بشنوئی گینگ نے قبول کی تھی۔