اسرائیل کی غزہ میں وحشیانہ بمباری سے مزید 80 فلسطینی شہید

غزہ :شمالی اور وسطی غزہ کے مختلف مقامات پر اسرائیلی طیاروں، ٹینکوں اور ڈرونز کے شدید حملوں میں تقریباً 80 فلسطینی شہید اور درجنوں زخمی ہو گئے ہیں۔

فلسطینی میڈیا کے مطابق، ان حملوں میں بے گھر فلسطینیوں کو نشانہ بنایا گیا، جو خیموں میں رہائش پذیر تھے، اور شہید اور زخمی ہونے والوں میں بڑی تعداد خواتین اور بچوں کی شامل ہے۔

رپورٹس کے مطابق، غزہ کے وسطی علاقے دیر البلاح میں مسجد توبہ کے قریب بے گھر افراد کے خیموں پر بمباری کی گئی، جبکہ شمالی غزہ کے بیت الاہیا علاقے پر اسرائیل کی ٹینکوں کے زریعے شدید گولہ باری جاری ہے۔

جنوبی غزہ کے محلے الصابرہ میں السلام مسجد کے قریب ایک گھر پر بھی اسرائیلی طیاروں کی بمباری کی گئی، جس کے نتیجے میں کئی افراد شہید اور زخمی ہوئے۔ اسی طرح، دلول خاندان کے گھر پر بھی بمباری کی گئی۔ وسطی غزہ کے الزوائدہ علاقے میں بے گھر افراد کے خیموں پر ہونے والے حملوں میں بھی متعدد افراد کی شہادت اور زخمی ہونے کی اطلاعات ہیں۔