طالبان نے افغانستان میں خواتین کو کرکٹ کھیلنے کی اجازت دے دی

83

کابل : افغان طالبا ن نے خواتین کو کرکٹ کھیلنے کی اجازت دے دی  ۔افغان کرکٹ بورڈ کے سربراہ نے کہا ہے کہ خواتین کرکٹرز کی تمام ضروریات پوری کریں گے  ۔

تفصیلات کے مطابق چیئرمین افغان کرکٹ بورڈ میر واعظ اشرف نے کہا ہے کہ افغانستان میں خواتین کو کرکٹ کھیلنے کی اجازت ہے ۔ افغان کرکٹ بورڈ کے نومنتخب چیئرمین میر واعظ اشرف نے کہا ہے  کہ خواتین کی کرکٹ انٹرنیشنل کرکٹ کونسل (آئی سی سی) کی بڑی ضروریات میں سے ایک ہے اور ہم اس پر کام کرنے کیلئے پُرعزم ہیں۔

میر واعظ اشرف کا مزید کہنا تھا کہ ہماری خواتین ٹیم معمول کے مطابق کرکٹ کھیلے گی اور ہم خواتین کرکٹرز کی تمام بنیادی ضروریات پوری کریں گے اور انہیں سہولیات فراہم کریں گے۔

یاد رہے کہ اس سے قبل آئی سی سی نے افغانستان میں طالبان کی جانب سے خواتین کھلاڑیوں پر پابندی لگائے جانے کے بعد کرکٹ معاملات کی دیکھ بھال کیلئے ایک ورکنگ گروپ تشکیل دیا تھا۔

خیال رہے کہ افغانستان میں طالبان کی حکومت کے بعد طالبان کے ثقافتی کمیشن کے نائب سربراہ احمداللہ واثق نے آسٹریلوی میڈیا سے گفتگو کرتے ہوئے کہا تھا کہ خواتین کو کرکٹ سمیت کسی بھی ایسے کھیل کی اجازت نہیں دیں گے جس میں ان کا جسم اور چہرہ ڈھکا ہوا نہ ہو ۔

تبصرے بند ہیں.