افغان شہریوں کو ملک چھوڑنے سے روکیں ، طالبان کی مساجد کے اماموں کو ہدایت

کابل :  افغانستان میں طالبان کے کنٹرول کے بعد پہلا جمعتہ المبارک ادا کیا گیا ۔

طالبان نے اس موقع پر تمام مساجد کے امام حضرات کو ہدایات جاری کیں کہ وہ شہریوں کو ملک نہ چھوڑنے کی تلقین کریں ۔

غیرملکی خبر رساں ادارے کی ایک رپورٹ کے مطابق طالبان کی جانب سے کابل میں مبلغین کو پیغامات بھجوائے گئے جس میں مساجد کے امام سے توقع کی گئی ہے کہ وہ کابل اور ملک کے تمام صوبوں میں اسلامی نظام اور اتحاد کو فروغ دینے کے لیے کام کریں گے۔

طالبان کے پیغام میں مبلغین کو کہا گیا ہےکہ وہ شہریوں کو ملک و قوم کی ترقی کے کاموں میں حصہ لینے کی ترغیب دیں اور ساتھ ہی انہیں ملک سے فرار ہونے سے روکنے کی بھی تلقین کریں۔

طالبان نے کہا ہےکہ آئمہ کرام شہریوں پر زور دیں کہ وہ دشمن کے منفی پروپیگنڈے پر کان نہ دھریں۔

دوسری جانب طالبان عہدیداران نے طالبان جنگجوؤں کو شہریوں کے  ساتھ مساجد میں نماز جمعہ پڑھنے کی بھی اجازت دی ہے۔