پاکستانی معیشت بہتری کی جانب گامزن، ترسیلات زر میں 26 فیصد اضافہ ریکارڈ ہوا: گورنر سٹیٹ بینک

کراچی: گورنر سٹیٹ بینک رضا باقر نے کہا ہے کہ پاکستانی معیشت بہتری کی جانب گامزن ہے اور اس میں مثبت رجحان دیکھنے میں آ رہا ہے۔ اس کی بڑی وجہ ترسیلات زر ہیں، جن میں 26 فیصد تک اضافہ دیکھنے میں آیا ہے۔ انہوں نے کہا کہ کورونا کی عالمی وبا سے قبل معاشی اشاریے مستحکم تھے۔

یہ بات گورنر سٹیٹ بینک رضا باقر نے پاکستان سٹاک مارکیٹ کے دورہ کے موقع پر ایک تقریب سے خطاب میں بتائی۔ ان کا کہنا تھا کہ مختلف معاشی شعبوں میں دن بدن بہتری دیکھنے میں آ رہی ہے جبکہ ترسیلات زر میں بھی اضافہ قومی معیشت کیلئے اچھا ہے۔

گورنر سٹیٹ بینک رضا باقر کا کہنا تھا کہ گزشتہ سال کا موازنہ کیا جائے تو 2021ء کے دوران اب تک ترسیلات کی شرح میں تقریباً 43 فیصد تک اضافہ دیکھا گیا ہے۔ اس کے علاوہ ملک میں آٹوموبائل شعبے میں بہتری آئی ہے۔

ان کا کہنا تھا کہ رواں مالی سال کے 9 مہینوں کی ترسیلات زر گزشتہ مالی سال کے مقابل 26 فیصد زائد ہیں۔ انہوں نے امید ظاہر کی کہ عیدالفطر پر ترسیلات مزید بڑھ سکتی ہیں۔

رضا باقر نے بتایا کہ بیرون ملک مقیم پاکستانیوں نے مسلسل دسویں مہینے 2 ارب ڈالر کی ترسیلات بھیجی ہیں۔

دوسری جانب وزیراعظم عمران خان نے کہا ہے کہ بیرون ملک پاکستانیوں کی پاکستان سے محبت اور وابستگی بے مثال ہے۔ عالمی وبا کے باوجود بیرون ملک پاکستانیوں نے ترسیلات زر کا ریکارڈ قائم کیا۔

اپنی ٹویٹ میں عمران خان نے کہا کہ اوورسیز پاکستانیوں نے کووڈ 19 کے باوجود 10 مہینوں میں 2 ارب ڈالر بھیج کر ریکارڈ قائم کیا۔ اوورسیز پاکستانیوں کی ترسیلات زر مارچ میں بڑھ کر 2.7 ارب ڈالر ہو گئیں۔

وزیر اعظم نے اپنے پیغام میں بیرون ملک مقیم پاکستانیوں کا شکریہ ادا کرتے ہوئے کہا کہ اوورسیز کی ترسیلات زر گزشتہ سال کے مقابلے میں 43 فیصد زیادہ ہیں، رواں مالی سال میں اب تک آپ کی ترسیلات زر میں 26 فیصد کا اضافہ ہوا ہے۔