شیر افضل مروت کو پارٹی پالیسی کی خلاف ورزی پر دوبارہ شوکاز نوٹس

اسلام آباد: تحریک انصاف کے رہنما شیر افضل مروت کو ایک مرتبہ پھر پارٹی پالیسی کے خلاف بیان دینے پر شوکاز نوٹس جاری کر دیا گیا ہے۔ پی ٹی آئی کے ایڈیشنل سیکرٹری جنرل فردوس شمیم نقوی کی جانب سے جاری کیے گئے شوکاز نوٹس میں شیر افضل مروت پر پارٹی رہنماؤں کے خلاف بیانات دینے اور پارٹی کے اصولوں کی خلاف ورزی کا الزام عائد کیا ہے۔

نوٹس میں شیر افضل مروت سے 7 دن میں وضاحت طلب کی گئی ہے اور انہیں ہدایت کی گئی ہے کہ وہ شوکاز نوٹس کا جواب دینے تک میڈیا پر کسی قسم کا بیان نہ دیں۔

شیر افضل مروت نے اس حوالے سے کہا کہ وہ اپنے دوستوں کے مشورے پر اگلے ایک دو ہفتے تک میڈیا سے دور رہنے کا فیصلہ کر چکے ہیں۔ یاد رہے کہ گزشتہ سال بھی شیر افضل مروت کو پی ٹی آئی کے جنرل سیکرٹری عمر ایوب کی طرف سے شوکاز نوٹس جاری کیا گیا تھا۔