امریکی صدارتی انتخابات 2024: ٹرمپ 248 الیکٹورل ووٹ سے آگے ، کملا216ووٹ کےساتھ پیچھے

واشنگٹن: امریکی صدارتی انتخابات 2024 کے لیے پولنگ کا عمل مکمل ہو چکا ہے، اور مختلف ریاستوں میں ووٹوں کی گنتی کا آغاز ہو چکا ہے۔

ان ریاستوں میں جارجیا، جنوبی کیرولائنا، ورمونٹ، ورجینیا، فلوریڈا، شمالی کیرولائنا، ویسٹ ورجینیا، اوہائیو، الینوائے، میری لینڈ اور پینسلوینیا شامل ہیں، جہاں ووٹوں کی گنتی جاری ہے۔ تاہم، کچھ ریاستوں میں ابھی بھی ووٹنگ کا عمل جاری ہے۔

اب تک کے نتائج کے مطابق، ریپبلکن امیدوار ڈونلڈ ٹرمپ نے 248 اور ڈیموکریٹک امیدوار کملا ہیرس نے 216 الیکٹورل ووٹ حاصل کیے ہیں۔ ایوان نمائندگان میں ریپبلکن پارٹی 99 سیٹوں کے ساتھ آگے ہے، جبکہ ڈیموکریٹس 59 سیٹوں پر کامیاب ہوئے ہیں۔ سینیٹ میں بھی ریپبلکن پارٹی 42 سیٹوں پر اور ڈیموکریٹس 33 سیٹوں پر کامیاب ہیں۔

امریکی انتخابات میں کل 538 الیکٹورل ووٹ ہیں، اور کسی بھی امیدوار کو جیت کے لیے کم از کم 270 الیکٹورل ووٹ درکار ہوں گے۔ اس کے علاوہ، ایوان نمائندگان کے 435 ارکان اور سینیٹ کے 100 ارکان کا انتخاب بھی ہو رہا ہے۔

امریکی میڈیا کے مطابق، 7 کروڑ 89 لاکھ افراد پہلے ہی اپنے ووٹ کاسٹ کر چکے ہیں، اور 11 ریاستوں میں گورنرز کے انتخاب بھی ہو رہے ہیں۔

انتخابات میں سب سے اہم ریاستوں میں ایریزونا، جارجیا، مشی گن، نیواڈا، شمالی کیرولائنا، پینسلوینیا اور وسکونسن کی اہمیت بہت زیادہ ہے، کیونکہ یہ ریاستیں انتخابات کے نتائج میں فیصلہ کن کردار ادا کر سکتی ہیں۔

پولنگ کے اوقات مختلف ریاستوں میں مختلف تھے: انڈیانا اور کینٹکی میں پاکستانی وقت کے مطابق صبح 4 بجے پولنگ کا وقت ختم ہو گیا، جارجیا اور شمالی کیرولائنا میں صبح 6 سے 7 بجے کے درمیان، اور مشی گن، پنسلوینیا، وسکونسن میں صبح 7 سے 8 بجے کے درمیان پولنگ کا وقت ختم ہوا۔ آخرکار، الاسکا میں پاکستانی وقت کے مطابق صبح 11 بجے پولنگ کا وقت ختم ہوگا۔