فلسطینی میڈیکل طلبا کی پاکستان آمد کا سلسلہ جاری

اسلام آباد : غزہ سے تعلق رکھنے والے فلسطینی میڈیکل کے طلبہ و طالبات پاکستان کے دارالحکومت اسلام آباد پہنچ گئے ہیں، جہاں ان کا گرمجوشی سے استقبال کیا گیا۔

وزارت صحت کے ترجمان کے مطابق یہ طلبہ وزیراعظم پاکستان شہباز شریف کی ہدایت پر لائے گئے ہیں، جنہوں نے غزہ کی صورتحال کو دیکھتے ہوئے ان طلبہ کو پاکستان میں اپنی تعلیم جاری رکھنے کی پیشکش کی تھی۔

ڈاکٹر مختار بھرتھ، جو کہ کوآرڈینیٹر برائے صحت ہیں، نے اسلام آباد ایئرپورٹ پر طلبہ کا استقبال کرتے ہوئے کہا کہ یہ طلبہ پاکستان کے مختلف طبی اداروں میں میڈیکل اور ڈینٹل کی تعلیم جاری رکھیں گے۔ غزہ میں اسرائیلی بمباری کی تباہ کاریوں کے بعد ان کے لیے اپنی تعلیم جاری رکھنا مشکل ہو گیا تھا، اس لیے پاکستان نے انہیں یہ موقع فراہم کیا ہے تاکہ وہ تعلیم مکمل کرنے کے بعد اپنے لوگوں کی خدمت کر سکیں۔

ڈاکٹر مختار نے مزید کہا کہ فلسطینی طلبہ کو تعلیم کے ساتھ ساتھ رہائش، خوراک اور دیگر سہولیات بھی فراہم کی جائیں گی تاکہ وہ اس مشکل وقت میں سکون سے اپنی تعلیم مکمل کر سکیں۔