پرچون فروشوں پر سیلز ٹیکس بڑھانے کی تجویز مسترد

اسلام آباد: سینیٹ کی قائمہ کمیٹی برائے خزانہ نے پوائنٹ آف سیلز سے مربوط پہلے درجے کے پرچون فروشوں پر سیلز ٹیکس 15 سے بڑھا کر 18 فیصد کرنے کی ایف بی آر کی بجٹ تجویز مکمل طور پر مسترد کر دی ہے۔

زید بشیر کی قیادت میں پاکستان ریٹیل بزنس کونسل نے سینیٹ کی قائمہ کمیٹی برائے مالیات کے سامنے درخواست پیش کی کہ پی او ایس (POS) سے منسلک ریٹیلرز پر سیلز ٹیکس کو 15 فیصد سے بڑھا کر 18 فیصد نہ کیا جائے۔

وفد نے سینیٹرز کو بتایا کہ ریٹیل سیکٹر کا صرف 5 فیصد حصہ رجسٹرڈ ہے اور وہ بار بار ہمارے پیچھے آتے ہیں جبکہ 95 فیصد حصہ صفر ٹیکس ادا کرتا ہے۔ دستاویزی ریٹیل سیکٹر پہلے ہی 29 فیصد انکم ٹیکس، 10 فیصد سپر ٹیکس، 15 فیصد ڈیویڈنڈ ٹیکس، 7 فیصد ورکرز ویلفیئر فنڈ اور ورکرز پارٹیسپیشن فنڈ وغیرہ جو کہ پہلے ہی تقریباً 57 فیصد ہے، ادا کر رہا ہے اور یہ اضافی 3 فیصد ہمیں 60 فیصد تک لے جائے گا جبکہ دوسرے 95 فیصد ریٹیلرز کچھ نہیں دیتے۔