عام انتخابات، پنجاب میں سیکیورٹی انتظامات کیلئے4 ارب 10 کروڑ روپے کےفنڈز منظور
لاہور: پنجاب میں 8 فروری کو ہونے والے عام انتخابات میں فول پروف سکیورٹی انتظامات کے لیے 4 ارب 10 کروڑ روپے فنڈ کی منظوری دے دی گئی۔
نگران وزیراعلیٰ پنجاب محسن نقوی کی زیر صدارت صوبائی کابینہ کا اجلاس ہوا جس میں صوبہ بھر میں عام انتخابات کے دوران فول پروف سکیورٹی انتظامات کے لیے 4 ارب 10 کروڑ روپے فنڈ کی منظوری دی گئی۔
محسن نقوی نے کہا ہے کہ پرامن ماحول کے لیے الیکشن کمیشن سے بھرپور تعاون کریں گے، تمام جماعتوں کو آزادانہ انتخابی سرگرمیوں کی اجازت ہوگی۔ فری اینڈ فیئر الیکشن کا انعقاد ہر صورت یقینی بنایا جائے گا اور تمام جماعتوں کو یکساں لیول پلیئنگ فیلڈ فراہم کی جائے گی۔
محسن نقوی کا کہنا تھا کہ امیدواروں کو جلسہ کرنے اور بینرز و پوسٹر لگانے کی اجازت ہوگی تاہم قومی اداروں کے خلاف تقاریر پر کارروائی کی جائے گی۔
علاوہ ازیں کابینہ اجلاس میں مناواں میں پنجاب کینسر کیئر ہسپتال کے قیام کے لیے 8 ارب روپے فنڈ کی بھی منظوری دی گئی جبکہ صحت سہولت پروگرام کے تحت علاج معالجے کے لیے نئے اقدامات کی منظوری بھی دی گئی ہے۔
تبصرے بند ہیں.