وزیراعظم عمران خان آج مظفر آباد میں جلسہ عام سے خطاب کرینگے

مظفر آباد: آزاد کشمیر الیکشن میں سیاسی گہما گہمی جاری، وزیراعظم عمران خان آج یونیورسٹی گراؤنڈ میں جلسہ عام سے خطاب کرینگے۔

گذشتہ روز بھمبر اور میرپور میں کامیاب جلسوں کے بعد آج وزیراعظم عمران خان یونیورسٹی گراؤنڈ مظفرآباد میں انتخابی جلسے سے خطاب کریں گے۔

وزیراعظم کے ہمراہ شاہ محمود قریشی، شیخ رشید اوردیگررہنما بھی مظفر آباد روانہ ہونگے۔

وزیراعظم عمران خان نے گذشتہ روز بھمبر میں عوامی اجتماع سے خطاب کرتے ہوئے کہا کہ ملک میں قانون کی حکمرانی کی جنگ لڑ رہے ہیں جبکہ قوم حق اور سچ کے نظریئے کے ساتھ بنتی ہے اور مقبوضہ کشمیر کے عوام بھارتی مظالم کیخلاف کھڑے ہیں ہمیں ان پر فخر ہے۔

باغ،بھمبر اور میرپور میں کامیاب جلسہ کرنے کے بعد نوجوانوں کے دلوں کی دھڑکن،سفیر کشمیر وزیراعظم عمران خان آج دارلحکومت مظفرآباد تشریف لا رہے ہیں،جہاں وہ بڑے عوامی اجتماع سے تاریخ ساز خطاب کریں گے۔#کشمیر_کا_کپتان_عمران_خان pic.twitter.com/OmilfZp5ie

— PTI Azad Kashmir (@PTIAJK_Official) July 19, 2021

وزیراعظم کا کہنا تھا کہ ہم ظلم اور پرانے نظام کے خلاف جہاد کر رہے ہیں اور عوام کی طاقت سے مافیا کو شکست دوں گا اور نیا پاکستان بنا کر دکھاؤں گا کیونکہ کپتان کو مقابلہ کرنا آتا ہے اور آنے والے دنوں میں مقبوضہ کشمیر کو آزاد دیکھیں گے۔

واضح رہے کہ پچیس جولائی کو آزاد کشمیر میں عام انتخابات کے لئے پولنگ ہونے جارہی ہے، پاکستان پیپلز پارٹی، پاکستان مسلم لیگ(ن) کا پی ٹی آئی سے کانٹے دار مقابلے کی توقع ہے۔