شاہد آفریدی کی بڑی بیٹی اقصیٰ کے ہاں پہلے بچے کی پیدائش

کراچی : پاکستان کرکٹ ٹیم کے سابق کپتان شاہد خان آفریدی کی بڑی بیٹی اقصیٰ کے ہاں پہلے بچے کی پیدائش ہوئی ہے۔ شاہد آفریدی نے یہ خوشخبری اپنے سوشل میڈیا اکاؤنٹ پر مداحوں کے ساتھ شیئر کی۔

انہوں نے کہا، "الحمدللہ، 16 دسمبر کو اللہ نے اقصیٰ اور نصیر کو ایک خوبصورت بیٹی ‘آئرا’ سے نوازا ہے۔” شاہد آفریدی نے بیٹیوں کو اللہ کی رحمت اور قیمتی نعمت قرار دیتے ہوئے مداحوں سے درخواست کی کہ وہ اپنی دعاؤں میں انہیں یاد رکھیں۔

آفریدی نے ساتھ ہی ایک تصویر بھی پوسٹ کی، جس میں اقصیٰ اور ان کے شوہر نصیر ناصر خان اپنی نومولود بیٹی آئرا کو اپنے ہاتھوں میں اٹھائے ہوئے ہیں۔

واضح رہے کہ اقصیٰ اور نصیر ناصر خان کا نکاح دسمبر 2022 میں ہوا تھا، جبکہ ان کی رخصتی جولائی 2023 میں ہوئی تھی۔ اس سے پہلے، شاہد آفریدی کی بیٹی انشا اور فاسٹ بولر شاہین آفریدی کے ہاں بھی بیٹے کی پیدائش ہوئی تھی، جس کے بعد شاہد آفریدی نانا بنے تھے۔