نادرا نے ‘پاک آئی ڈی’ ایپ میں نئے فیچرز شامل کر دیے

اسلام آباد:نادرا نے اپنی ‘پاک آئی ڈی’ ایپلی کیشن میں کئی نئے فیچرز کا اضافہ کیا ہے۔

تفصیلات کے مطابق، نادرا نے پی او سی کے حامل افراد کے لیے ویڈیو یا تصویر کے ذریعے تصدیق کی سہولت فراہم کی ہے، جس سے شناختی دستاویزات میں تبدیلی کا عمل کافی آسان ہو گیا ہے۔ ‘پاک آئی ڈی’ ایپ میں فنگر پرنٹس کے پیچیدہ طریقے کو مزید بہتر بنایا گیا ہے، اور صارفین آٹو میٹڈ میسیجنگ کے ذریعے کسی بھی قسم کی دستاویزات کی تازہ ترین معلومات حاصل کر سکتے ہیں۔

ایپ میں نادرا دفاتر کے بارے میں تمام ضروری معلومات بھی شامل کی گئی ہیں۔

یہ بات قابل ذکر ہے کہ جدید ‘پاک آئی ڈی موبائل ایپ’ کے ذریعے شہری نہ صرف شناختی کارڈ اور دیگر شناختی دستاویزات کی درخواستیں اپنے موبائل فون پر مکمل کر سکتے ہیں، بلکہ وہ اپنی دستاویزات کو گھر پر بھی منگوانے کی سہولت حاصل کر سکتے ہیں۔

‘پاک آئی ڈی’ موبائل ایپ کی بدولت پاکستانی شہریوں کو اب نادرا دفاتر میں جانے اور لمبی قطاروں میں انتظار کرنے کی ضرورت نہیں ہے۔