اپنے ملک میں ملنے والی عزت اور پیار سے بہت خوش ہوں، دوسرے ملک جاکر فلمیں کرنے کا نہیں سوچا:مہوش حیات

لاہور:اداکارہ مہوش حیات کا کہنا ہے کہ اپنے ملک میں ملنے والی عزت اور پیار سے بہت خوش ہوں، اس لیے دوسرے ملک جاکر فلمیں کرنے کا نہیں سوچا۔ مہوش حیات نے ایک یوٹیوب چینل کو انٹرویو دیا، جس کی مختصر ویڈیو وائرل ہوگئی، جس میں انہوں نے بالی وڈ فلموں میں کام کی پیش کش سے متعلق بتایا۔مہوش حیات نے کہاکہ  اپنے ملک میں ملنے والی عزت اور پیار سے بہت خوش ہوں، اس لیے دوسرے ملک جاکر فلمیں کرنے کا نہیں سوچا۔

اگرچہ مہوش حیات نے بتایا کہ انہوں نے پاکستانی فلموں اور پاکستانی شائقین کی جانب سے ملنے والی محبت کی خاطر بولی وڈ فلموں میں کام نہیں کیا، تاہم انہوں نے واضح نہیں کیا کہ انہیں کون سی بولی وڈ فلموں میں کام کی پیش کش ہوئی تھی؟
مہوش حیات اگرچہ بولی وڈ فلموں میں نظر نہیں آئیں، تاہم وہ مس مارول نامی امریکی سپر ہیرو ویب سیریز میں فواد خان کے ساتھ کام کر چکی ہیں۔

اداکارہ کا کہنا تھا کہ وہ خوش قسمت ہیں کہ انہیں پاکستان میں اچھی فلموں میں کام کرنے کا موقع ملا اور وہ ان فلموں کا حصہ رہیں جو ملک میں سینمائوں کی بحالی کے لیے اہم رہیں۔مہوش حیات کا کہنا تھا کہ انہوں نے پاکستان کے معروف فلم سازوں نبیل قریشی اور ندیم بیگ کے ساتھ کام کیا، جن کی فلمیں ملک بھر میں شوق سے دیکھی اور سراہی جاتی ہیں، اس لیے انہیں بیرون ملک جاکر کام کرنے کا خیال ہی نہیں آیا۔

اداکارہ کے مطابق ان کی اداکاری اور کام ملک میں بہت پسند کیا جاتا ہے اور انہیں سراہا بھی جاتا ہے، اس لیے وہ یہیں خوش ہیں۔