نیہا ککڑ کا پاکستانی مداحوں اور عاصم اظہر کے لیے محبت بھرا پیغام

ممبئی: بھارتی گلوکارہ نیہا ککڑ نے پاکستانی مداحوں اور پاکستانی گلوکار عاصم اظہر کے لیے محبت کا بھرپور اظہار کیا ہے۔

ایک پریس کانفرنس کے دوران نیہا ککڑ نے کہا کہ "جہاں بھی میں پاکستانیوں سے ملی ہوں، میں نے ہمیشہ انہیں بے پناہ محبت اور عزت دیتے دیکھا ہے۔” انہوں نے اپنے پاکستانی مداحوں کا شکریہ ادا کرتے ہوئے کہا کہ ان کی محبت ہمیشہ ان کے دل کو خوشی دیتی ہے۔

نیہا ککڑ نے مزید کہا کہ وہ پاکستانی گلوکار عاصم اظہر کے ساتھ کام کرنا چاہیں گی، کیونکہ عاصم اظہر کے گانے پہلے ہی بالی ووڈ فلموں میں مقبول ہو چکے ہیں اور ان کی موسیقی عالمی سطح پر پسند کی جاتی ہے۔

نیہا ککڑ بھارتی میوزک انڈسٹری کی ایک کامیاب گلوکارہ ہیں اور ان کے گانے ہمیشہ ہی شائقین کے دلوں میں گھر کر جاتے ہیں۔ ان کے انسٹاگرام پر 78 ملین سے زیادہ فالوورز ہیں، اور وہ سوشل میڈیا پر بھی ایک بڑی شخصیت ہیں۔ ان کے گانے نہ صرف بھارت میں بلکہ پاکستان میں بھی ٹرینڈ کرتے ہیں۔