قیمتی دھات کی قیمت میں اتار چڑھاؤ جاری، فی تولہ 1,000 روپے بڑھ گیا

کراچی: سونے کی قیمت میں حالیہ دنوں جاری کمی کا رجحان تھم گیا، اور آج سونے کی قیمت میں اضافہ دیکھنے میں آیا ہے۔

جیولرز ایسوسی ایشن کے مطابق، 24 قیراط سونے کی فی تولہ قیمت 1,000 روپے اضافے کے بعد 2,75,900 روپے ہو گئی ہے۔

10 گرام سونے کی قیمت بھی 852 روپے بڑھ کر 2,36,540 روپے تک پہنچ گئی ہے۔

یاد رہے کہ گزشتہ روز فی تولہ سونا 2,100 روپے کی کمی کے بعد 2,74,900 روپے اور 10 گرام سونا 1,800 روپے کم ہو کر 2,35,682 روپے پر آ گیا تھا۔

اس سے ایک دن قبل (16 دسمبر) 24 قیراط فی تولہ سونا 800 روپے کمی کے بعد 2,77,000 روپے اور 10 گرام سونا 687 روپے کمی کے ساتھ 2,37,482 روپے کا ہو گیا تھا۔

13 دسمبر کو سونے کی قیمتوں میں سب سے زیادہ کمی دیکھنے میں آئی تھی، جب فی تولہ سونا 5,000 روپے سستا ہو کر 2,77,800 روپے اور 10 گرام سونا 4,286 روپے کی کمی سے 2,38,169 روپے پر آ گیا تھا۔

ماہرین کے مطابق، سونے کی قیمتوں میں یہ اتار چڑھاؤ بین الاقوامی مارکیٹ کے رجحانات اور مقامی حالات کی عکاسی کرتا ہے۔