اے بی ڈی ویلیئرز کی کرکٹ میں واپسی: ورلڈ چیمپئن شپ آف لیجنڈز میں کھیلیں گے

117

 

کیپ ٹاؤن:  چار سال قبل تمام طرز کی کرکٹ سے ریٹائر ہونے والے سابق جنوبی افریقی کپتان اے بی ڈی ویلیئرز نے کرکٹ میں واپسی کا فیصلہ کیا ہے۔

ڈی ویلیئرز نے خود تصدیق کی ہے کہ وہ ایک مرتبہ پھر کرکٹ میدان میں کھیلتے نظر آئیں گے۔

اے بی ڈی ویلیئرز نے 2018 میں انٹرنیشنل کرکٹ سے ریٹائرمنٹ کا اعلان کیا تھا، جبکہ وہ 2021 تک فرنچائز کرکٹ کھیلتے رہے تھے۔ تاہم، 2021 میں انہوں نے کرکٹ سے مکمل طور پر کنارہ کشی اختیار کرنے کا فیصلہ کیا تھا، اور ان کا آخری میچ آئی پی ایل میں رائل چیلنجز بنگلور کے لیے تھا۔

اب اے بی ڈی ویلیئرز نے اعلان کیا ہے کہ وہ رواں سال ورلڈ چیمپئن شپ آف لیجنڈز کے دوسرے ایڈیشن میں جنوبی افریقا چیمپئنز کی نمائندگی کریں گے اور اس کے علاوہ ٹیم کی قیادت بھی کریں گے۔اپنی کرکٹ میں واپسی کے فیصلے پر روشنی ڈالتے ہوئے ڈی ویلیئرز نے کہا کہ چار سال پہلے کرکٹ سے ریٹائرمنٹ کا فیصلہ انہوں نے اس لیے کیا تھا کیونکہ اس وقت کھیلنے کی خواہش کم ہو گئی تھی، مگر اب وقت کے گزرنے کے ساتھ ان کے بیٹے کی کرکٹ میں دلچسپی نے انہیں دوبارہ کرکٹ کھیلنے کا جذبہ دیا ہے۔

انہوں نے مزید کہا کہ اب وہ دوبارہ فٹنس کے لیے نیٹس اور جم میں جا کر تیاری کر رہے ہیں اور ورلڈ چیمپئن شپ آف لیجنڈز کے ایڈیشن میں حصہ لینے کے لیے مکمل طور پر تیار ہیں۔

اے بی ڈی ویلیئرز کی کرکٹ میں واپسی پر کرکٹ کے شائقین میں خوشی کی لہر دوڑ گئی ہے اور مداح بے صبری سے ان کا دوبارہ ایکشن میں آنے کا انتظار کر رہے ہیں۔

تبصرے بند ہیں.