اسلام آباد: متحدہ عرب امارات (یو اے ای) کے شہر فجیرہ کے قریب سمندر میں بچھائی گئی انٹرنیٹ کیبل خراب ہونے سے پاکستان میں انٹرنیٹ کی رفتار میں کمی واقع ہو گئی تھی تاہم مذکورہ کیبل میں پیدا ہونے والی خرابی کو دور کر دیا گیا ہے۔
پاکستان ٹیلی کمیونی کیشن اتھارٹی (پی ٹی اے) کی جانب سے جاری بیان میں کہا گیا ہے کہ فجیرہ کے قریب زیر سمندر بچھی انٹرنیٹ کیبل میں پیدا ہونے والی خرابی دور کر دی گئی ہے اور مذکورہ کیبل کے ذریعے انٹرنیٹ سروسز کو مکمل طور پر بحال کرنے کیلئے کام جاری ہے۔
ایک روز قبل ملک بھر میں سست رفتار انٹرنیٹ کی شکایات موصول ہونے لگی تھیں جس کی وجہ یہ بتائی گئی کہ زیر سمندر بچھی 25 ہزار کلومیٹر طویل ایشیاءیورپ ڈبل اے ای ون کیبل میں خرابی پیدا ہو گئی ہے۔ تاہم پی ٹی اے نے سماجی رابطوں کی ویب سائٹ ٹوئٹر پر جاری بیان میں بتایا ہے کہ خراب ہونے والی کیبل ٹھیک کی جا چکی ہے۔
A submarine cable fault was reported yesterday near Fujairah, UAE due to which some users may have faced degradation in services. The faulty cable segment has been repaired & work is underway to make the services fully functional.
— PTA (@PTAofficialpk) October 12, 2021
واضح رہے کہ گزشتہ روز یو اے ای میں فجیرہ کے قریب سب میرین کیبل میں خرابی کی نشاندہی کی گئی تھی جس کے باعث پاکستان میں متعدد صارفین کو انٹرنیٹ کی سست رفتاری کا سامنا کرنا پڑا۔
ذرائع کا کہنا تھا کہ فجیرہ کے قریب 40 ٹیرابائٹ کی کیبل ٹوٹ گئی جس کے باعث انٹرنیٹ سروسز متاثر ہوئیں جبکہ ذرائع کا مزید یہ کہنا تھا کہ خرابی کو دور کرنے میں کئی روز لگ سکتے ہیں۔