انسٹاگرام کی نئی ویڈیو ایڈیٹنگ ایپ "ایڈٹس” متعارف

کیلیفورنیا : انسٹاگرام نے ویڈیو ایڈیٹنگ کے لیے ایک نئی ایپ "ایڈٹس” متعارف کرائی ہے، جس کا مقصد صارفین کو ویڈیوز بنانے اور ایڈٹ کرنے میں سہولت فراہم کرنا ہے۔ انسٹاگرام کے سربراہ ایڈم موسیری نے اس ایپ کا اعلان کرتے ہوئے بتایا کہ "ایڈٹس” ایک مفت ایڈیٹنگ ایپ ہوگی جس میں کئی مختلف ٹولز شامل ہوں گے۔

 

اس ایپ میں ایک ٹیب انسپائریشن کے لیے مختص کیا گیا ہے، جبکہ دوسرا ٹیب ابتدائی خیالات کو ٹریک کرنے کی سہولت فراہم کرتا ہے۔ ایڈم موسیری کے مطابق، ایپ کا کیمرا ویڈیوز ریکارڈ کرنے میں مددگار ہوگا اور ایڈیٹنگ کے تمام ٹولز بھی فراہم کیے جائیں گے۔

 

ایڈٹس ایپ فروری میں صارفین کے لیے دستیاب ہو گی اور فی الحال آئی او ایس ایپ اسٹور پر پری آرڈر کے لیے موجود ہے۔ ایڈم موسیری نے کہا کہ ایپ کا پہلا ورژن مکمل نہیں ہوگا اور صارفین کو کچھ وقت صبر سے کام لینا پڑے گا۔

 

اس ایپ میں صارفین 10 منٹ تک ویڈیوز ریکارڈ کر سکیں گے اور انہیں مختلف ٹولز، فلٹرز، ایفیکٹس، آڈیو فیچر اور اے آئی فیچرز سے ایڈٹ کر سکیں گے۔ ایڈم موسیری نے ٹک ٹاک کا براہ راست ذکر نہیں کیا، مگر اس کی پابندی کے حوالے سے اشارہ دیتے ہوئے کہا کہ یہ ایپ صرف انسٹاگرام کے لیے نہیں بلکہ دیگر پلیٹ فارمز پر بھی استعمال کی جا سکے گی۔