لاہور : محکمہ موسمیات نے آج کے لیے ملک کے مختلف حصوں میں بارش اور برفباری کی پیشگوئی کی ہے۔ بالائی خیبر پختونخوا، شمالی بلوچستان، گلگت بلتستان، کشمیر اور ان کے ملحقہ پہاڑی علاقوں میں بارش اور پہاڑوں پر برفباری ہونے کا امکان ہے۔
پنجاب اور خیبر پختونخوا کے میدانی علاقوں اور بالائی سندھ میں دھند چھا سکتی ہے۔ اسلام آباد اور گرد و نواح میں موسم سرد رہنے کے علاوہ مطلع جزوی ابر آلود رہنے کی توقع ہے، جبکہ پنجاب کے بیشتر اضلاع میں بھی موسم سرد اور جزوی ابر آلود رہنے کی پیشگوئی کی گئی ہے۔ مری، گلیات اور ان کے آس پاس بارش اور ہلکی برفباری ہو سکتی ہے۔
خیبر پختونخوا کے چترال، دیر، سوات، کوہستان، باجوڑ، خیبر، شانگلہ، بونیر، بٹگرام، مانسہرہ اور ایبٹ آباد میں بارش اور برفباری متوقع ہے، اور صوابی، مردان، پشاور، نوشہرہ، کوہاٹ، کرک، کرم اور وزیرستان میں ہلکی بارش ہو سکتی ہے۔
بلوچستان کے بیشتر علاقوں میں موسم سرد اور ابر آلود رہنے کا امکان ہے، لیکن کوئٹہ، چمن، پشین، زیارت، قلعہ عبداللہ، قلعہ سیف اللہ، ژوب، بارکھان، لورالائی، موسیٰ خیل، قلات، پنجگور، تربت، دالبندین، لسبیلہ اور نوکنڈی میں کچھ مقامات پر بارش اور برفباری ہو سکتی ہے۔
البتہ سندھ کے بیشتر اضلاع میں موسم سرد اور خشک رہے گا، جبکہ کشمیر اور گلگت بلتستان میں موسم شدید سرد اور ابر آلود رہنے کے علاوہ وہاں بارش اور برفباری ہونے کا امکان ہے ۔