راولپنڈی: بلوچستان کے علاقے ژوب میں سیکیورٹی فورسز کے کامیاب آپریشن کے دوران 15 خوارج ہلاک ہو گئے ہیں، جبکہ ایک سپاہی نے جام شہادت نوش کیا۔
پاک فوج کے شعبہ تعلقات عامہ (آئی ایس پی آر) کے مطابق، 10 دسمبر 2024 کو سیکیورٹی فورسز نے ژوب کے علاقے سمبازہ میں انٹیلی جنس معلومات پر کارروائی کی، جس کے نتیجے میں خوارج کے ٹھکانے کو مؤثر طریقے سے نشانہ بنایا گیا۔ اس آپریشن میں 15 دہشت گرد مارے گئے۔
آئی ایس پی آر نے مزید بتایا کہ اس کارروائی کے دوران بڑی مقدار میں اسلحہ، گولہ بارود اور دھماکہ خیز مواد بھی برآمد ہوا ہے۔ اس آپریشن میں سپاہی عارف الرحمان (32 سال، ضلع مانسہرہ) نے بہادری سے لڑتے ہوئے شہادت پائی۔
پاک فوج نے کہا کہ علاقے میں کسی بھی باقی دہشت گرد کو بے اثر کرنے کے لیے سینیٹائزیشن آپریشن جاری ہے۔ سیکیورٹی فورسز نے عزم ظاہر کیا کہ پاکستان کے عوام کے ساتھ مل کر ملک کو دہشت گردی سے پاک کرنے کے لیے ان کی قربانیاں ہر قیمت پر جاری رہیں گی۔