لاہور: محکمہ موسمیات نے پاکستان کے مختلف حصوں میں گرج چمک کے ساتھ بارش اور پہاڑوں پر برفباری کا امکان ظاہر کیا ہے۔
محکمہ موسمیات کے مطابق بلوچستان،خیبر پختونخوا ، کشمیر اور گلگت بلتستان میں مطلع ابر آلود رہنے کے علاوہ تیز ہواؤں اور گرج چمک کے ساتھ بارش اور پہاڑوں پر برفباری کا امکان ہے۔ اسی طرح، بالائی پنجاب، اسلام آباد، مری اور گلیات میں شام یا رات کے وقت جزوی طور پر ابر آلود موسم، تیز ہوائیں اور ہلکی بارش کی توقع کی جا رہی ہے۔
ملک کے دیگر حصوں میں موسم خشک اور سرد رہنے کی پیشگوئی کی گئی ہے، جبکہ پنجاب کے کچھ میدانی علاقوں اور بالائی سندھ میں صبح اور رات کے اوقات میں دھند یا سموگ چھائے رہنے کا امکان ہے۔
بلوچستان کے مختلف اضلاع جیسے کوئٹہ، پشین، قلعہ سیف اللہ اور دیگر علاقوں میں تیز ہواؤں اور گرج چمک کے ساتھ بارش اور پہاڑوں پر برفباری ہو سکتی ہے۔ پنجاب کے بیشتر علاقوں میں سرد اور خشک موسم رہنے کی توقع ہے، مگر شام یا رات کے دوران چند علاقوں میں ہلکی بارش بھی ہو سکتی ہے۔
خیبر پختونخوا میں بھی بیشتر علاقوں میں ابر آلود موسم، بارش اور برفباری کا امکان ہے۔ سندھ کے زیادہ تر حصوں میں موسم خشک رہنے کی توقع ہے۔ کشمیر اور گلگت بلتستان میں بھی بارش اور برفباری کے ساتھ موسم خراب رہنے کی پیشگوئی کی گئی ہے۔