غزہ : غزہ اور جنوبی لبنان میں تازہ جھڑپوں میں 4 اسرائیلی فوجی ہلاک اور 9 زخمی ہوگئے ہیں۔ جنوبی لبنان میں حزب اللہ کے ساتھ ہونے والی لڑائی میں 3 اسرائیلی فوجی ہلاک ہوئے، جبکہ 8 دیگر زخمی ہیں۔ غزہ کے علاقے جبالیہ میں فلسطینی مزاحمت کاروں کے حملے میں ایک اسرائیلی فوجی ہلاک اور ایک شدید زخمی ہوگیا۔
اسرائیلی میڈیا کے مطابق، غزہ میں 2023 میں شروع ہونے والی جنگ سے اب تک اسرائیلی فوجیوں کی ہلاکتوں کی تعداد 800 تک پہنچ چکی ہے، جن میں حالیہ جبالیہ آپریشن میں 28 فوجی بھی شامل ہیں۔
دوسری جانب، اسرائیلی فوج نے لبنان میں 100 سے زیادہ اہداف کو نشانہ بنایا، جس کے نتیجے میں 4 لبنانی فوجیوں سمیت کئی شہری شہید ہوگئے۔ غزہ کے جبالیہ اور رفح کے علاقوں میں اسرائیلی بمباری سے 20 سے زائد فلسطینی بھی شہید ہو گئے۔
اسرائیلی فوج نے غزہ کے کمال عدوان اسپتال کا محاصرہ کر لیا ہے، جس سے اسپتال میں دواؤں اور خوراک کی شدید کمی ہو گئی ہے، اور ایمبولینسوں کو اسپتال میں داخل ہونے سے روکا جا رہا ہے۔