کراچی: آرمی چیف جنرل سید عاصم منیر نے کراچی ایکسپو سینٹر میں جاری بین الاقوامی دفاعی نمائش ”آئیڈیاز 2024“ کا دورہ کیا، جہاں پاکستان کا جدید ترین ”شاہپر تھری“ ڈرون عالمی سطح پر توجہ کا باعث بن گیا۔،
آرمی چیف نے اس موقع پر نمائش میں شریک مختلف ممالک کے دفاعی مینوفیکچررز کی فعال شرکت کو سراہا۔ اس سال کی نمائش میں 557 نمائش کنندگان شریک ہیں، جن میں 333 بین الاقوامی اور 224 پاکستانی نمائش کنندگان شامل ہیں۔ اس نمائش میں 36 ممالک نے اپنے اسٹالز لگائے ہیں، جن میں 17 ممالک پہلی بار شریک ہو رہے ہیں۔
”آئیڈیاز 2024“ میں 53 ممالک کے 300 سے زائد غیر ملکی مندوبین نے شرکت کی اور پاکستان کی دفاعی صنعت پر مکمل اعتماد کا اظہار کیا۔ آرمی چیف نے اس دوران غیر ملکی فوجی حکام اور دفاعی مندوبین کے ساتھ بامعنی بات چیت کی۔
پاکستان کے جدید ”شاہپر تھری“ ڈرون کا اس ایونٹ میں خصوصی طور پر مظاہرہ کیا گیا۔ یہ ڈرون 35,000 فٹ کی بلندی تک پرواز کر سکتا ہے اور 24 گھنٹے تک مسلسل پرواز کرنے کی صلاحیت رکھتا ہے۔ اس ڈرون میں بم، میزائل اور ٹارپیڈو جیسے مختلف گولہ بارود لے جانے کی صلاحیت ہے، جو پاکستان کی دفاعی صلاحیت کو مزید مستحکم کرتا ہے۔