پنجاب میں ڈینگی کیسز میں اضافہ، محکمہ صحت کی احتیاطی تدابیر کا اعلان

راولپنڈی :  محکمہ پرائمری اینڈ سیکنڈری ہیلتھ کیئر پنجاب نے صوبے بھر میں ڈینگی کے نئے کیسز کی تفصیلات جاری کر دی ہیں۔

گزشتہ 24 گھنٹوں میں پنجاب میں ڈینگی کے 63 کیسز رپورٹ ہوئے ہیں، جن میں سب سے زیادہ کیسز راولپنڈی سے سامنے آئے، جہاں 59 افراد میں ڈینگی کی تصدیق ہوئی۔ لاہور، چکوال، ساہیوال اور اوکاڑہ میں ایک ایک کیس رپورٹ ہوا ہے۔

محکمہ صحت کے مطابق، گزشتہ ایک ہفتے میں 750 نئے ڈینگی کیسز رپورٹ ہوئے ہیں، اور رواں سال کے آغاز سے اب تک مجموعی طور پر 6901 کیسز سامنے آ چکے ہیں۔

انسداد ڈینگی کے لیے محکمہ صحت نے تمام ضروری انتظامات مکمل کر لیے ہیں، اور تمام سرکاری ہسپتالوں میں ڈینگی سمیت دیگر ضروری ادویات کا ذخیرہ موجود ہے۔

محکمہ صحت نے شہریوں کو احتیاطی تدابیر اختیار کرنے کی ہدایت کی ہے، جیسے کہ گھروں میں پانی کھڑا نہ ہونے دیں، کیونکہ یہ مچھروں کی افزائش کا سبب بن سکتا ہے۔ اس کے علاوہ، مچھروں سے بچاؤ کے لیے ادویات، جالیاں اور دیگر حفاظتی تدابیر استعمال کرنے کی اپیل کی گئی ہے۔

محکمہ کا کہنا ہے کہ وہ ڈینگی کے مریضوں کے علاج کے لیے مکمل سہولتیں فراہم کر رہا ہے اور ایمرجنسی کی صورت میں ہسپتالوں میں تمام ضروری انتظامات کر لیے گئے ہیں۔