اسلام آباد: نگراں حکومت نے عوام کو ریلیف کے بجائے تکلیف کا بھر پور منصوبہ بنا رکھا ہے۔ نگراں وفاقی وزیر توانائی محمد علی نےکہا کہ موسم سرما میں گیس نہ صرف مہنگی ہوگی بلکہ گھریلو صارفین کو ملے گی بھی مشکل سے۔
اسلام آباد میں وفاقی وزیر اطلاعات مرتضیٰ سولنگی کے ہمراہ میڈیا سے گفتگو کرتے ہوئے نگران وزیر توانائی نے کہا کہ گھریلو صارفین کو سردیوں میں صبح، دوپہر اور رات کے اوقات میں مجموعی طور پر 8 گھنٹے گیس کی فراہمی یقینی بنانے کی کوشش کی جائے گی۔
وفاقی وزیر توانائی نے واضح کیا کہ ملک میں جتنی گیس دستیاب ہے اسی کے مطابق فراہمی یقینی بنائی جائے گی۔
محمد علی نے کہا گھریلو صارفین کودن صرف صبح، دوپہر اور شام میں چند اوقات میں گیس کی فراہمی کے باعث ایل پی جی کی آپشن کی طرف جانا پڑے گا۔
میڈیا سے گفتگو کے دوران نگران وزیر توانائی نے بتایا کہ دسمبر کیلئے 2 اضافی ایل این جی کارگوز کا بندوبست کرلیا ہے جبکہ جنوری کے لیے دو مزید ایل این جیز کارگوز سپاٹ مارکیٹ سے خریدے جائیں گے۔
نگراں وزیر کا مزید کہنا تھا کہ گیس کی قلت کے باعث نئے گیس کنکشنز پرپابندی برقراررہے گی۔
مزید براں گیس کی قیمتوں کے حوالے سے محمد علی کا کہنا تھا کہ غریب صارفین پرزیادہ بوجھ نہیں ڈالا، گیس قیمتوں میں صرف ان کے لیے فکسڈ چارجز 10روپے سے بڑھا کے 400 روپے کیے ہیں۔
وفاقی وزیر علی محمدکا کہنا تھا کہ گیس کی قیمتوں سے متعلق حتمی منظوری وفاقی کابینہ دے گی تاہم اقتصادی رابطہ کمیٹی نے جن قیمتوں کی منظوری دی ہے اسکے بعد ساڑھے 4 ہزارارب روپے سے زائد توانائی کے گردشی قرض میں مزید اضافہ نہیں ہوگا ۔