فاطمہ ثناایمرجنگ ویمن کرکٹر آف دی ایئر قرار 

دبئی : محمد رضوان کے بعد خاتون کرکٹر فاطمہ ثنا نے بھی پاکستان کا نام روشن کردیا ۔ فاطمہ ثنا کو 2021 کی ابھرتی ویمن کرکٹر قرار دیا گیا ہے۔

آئی سی سی کی طرف سے جاری  پریس ریلیز میں کہا گیا ہے کہ ایک نیا سٹار پیدا ہوگیا ہے۔ فاطمہ ثنا نے 2021 کے دوران 16 انٹرنیشنل میچ کھیلے ۔ 23.95 کی ایوریج سے 24 وکٹیں حاصل کیں جبکہ 16.50 کی اوسط سے 165 رنز بھی بنائے۔

آئی سی سی کا کہنا ہے کہ 20 سالہ باؤلر فاطمہ ثنا پاکستانی ون ڈے اور ٹی ٹوئنٹی ٹیم کا لازمی جز بن گئی ہیں اور انہوں نے نہ صرف بروقت وکٹیں حاصل کیں بلکہ ٹیم جب مشکل میں تھی تو رنز بھی بنائے۔

فاطمہ ثنا نے بنگلہ دیش، ویسٹ انڈیز ، جنوبی افریقا اور زمبابوے سمیت تمام ٹیموں کے خلاف بہترین کارکردگی دکھائی ہے۔ فاطمہ ثنا کی سب سے بہترین پرفارمنس جولائی میں ویسٹ انڈیز کے خلاف رہی ۔ انہوں نے پانچ وکٹیں حاصل کرنے کے ساتھ ساتھ 28 رنز بھی جوڑے۔