اسلام آباد: ملک بھر میں کام کرنے والی مختلف موبائل فون کمپنیز نے مری اور نتھیا گلی میں ایمرجنسی صورتحال کے دوران عوام کی سہولت کیلئے خصوصی مفت کالز کی سہولت فراہم کر دی ہے۔
تفصیلات کے مطابق ٹیلی کام کمپنی ’جاز‘ کے ترجمان کی جانب سے جاری بیان میں کہا گیا ہے کہ مری اور نتھیا گلی میں لوگوں کی سہولت کیلئے ایمرجنسی صورتحال کے دوران جاز نیٹ ورک پر آن نیٹ کالز فری کی جا رہی ہیں جس کے تحت صارفین کم بیلنس یا بنڈلز ختم ہونے کے باوجود بھی کالز کر سکتے ہیں۔
ترجمان کا کہنا ہے کہ متاثرہ علاقوں میں شدید مشکل حالات کے باوجود جاز نیٹ ورک کو فعال رکھنے کی ہر ممکن کوشش جاری ہے تاکہ وہاں پھنسے افراد کو اپنے پیاروں کے ساتھ رابطے کیلئے اور انتظامیہ سے امداد کی طلبی کیلئے رابطہ کرنے میں کسی بھی طرح کی مشکل پیش نہ آئے۔
دوسری جانب پاکستان ٹیلی کمیونی کیشن اتھارٹی (پی ٹی اے) کے مطابق مری اور گلیات کے علاقوں میں ہنگامی صورتحال کے پیش نظر ان علاقوں میں موجود ایسے صارفین جن کے پاس بیلنس نہیں ہے، فوری طور پر مفت آن نیٹ کالز کی سہولت فراہم کردی گئی ہے۔
پریس ریلیز : مری اور گلیات کے علاقوں میں ہنگامی صورتحال کے پیش نظر بیلنس نہ رکھنے والے وہ موبائل فون صارفین جو اس وقت ان علاقوں میں موجود ہیں، انہیں فوری طور پر مفت آن نیٹ کالوں کی سہولت فراہم کردی گئی ہے۔
— PTA (@PTAofficialpk) January 9, 2022
پی ٹی اے کا کہنا ہے کہ پی ٹی اے کی ہدایت پر موبائل فون آپریٹرز نے گلیات کے علاقوں میں پھنسے ہوئے صارفین کو صفر بیلنس ہونے پر اپنے نیٹ ورک کے نمبروں پرمفت کال کی سہولت فراہم کردی ہے اور تمام ٹیلی کام آپریٹرز کو یہ ہدایت کی ہے کہ وہ صارفین کو بلاتعطل خدمات کی فراہمی کو یقینی بنائیں۔