کابل: افغانستان میں شراب کی فروخت کے خلاف کریک ڈاﺅن کے بعد افغان انٹیلی جنس ایجنٹس کی ایک ٹیم نے 3 ہزار لٹر شراب کابل نہر میں بہا دی جس کی ویڈیو سوشل میڈیا پر جاری کی گئی ہے۔
جنرل ڈائریکٹوریٹ آف انٹیلی جنس (جی ڈی آئی) کی جانب سے جاری کی گئی ویڈیو میں دیکھا جا سکتا ہے کہ اس کے اہلکاروں نے کابل میں کارروائیوں کے دوران قبضے میں لی گئی شراب کے بیرل کابل نہر میں انڈیل دئیے۔ انٹیلی جنس حکام نے ویڈیو میں کہا کہ مسلمانوں کو شراب کشیدگی اور فروخت سے ہر صورت دور رہنا ہے ۔
د ا.ا.ا د استخباراتو لوی ریاست ځانګړې عملیاتي قطعې د یو لړ مؤثقو کشفي معلومات پر اساس د کابل ښار کارته چهار سیمه کې درې تنه شراب پلورونکي له شاوخوا درې زره لېتره شرابو/الکولو سره یو ځای ونیول.
نیول شوي شراب له منځه یوړل شول او شراب پلورونکي عدلي او قضايي ارګانونو ته وسپارل شول. pic.twitter.com/qD7D5ZIsuL— د استخباراتو لوی ریاست-GDI (@GDI1415) January 1, 2022
میڈیا رپورٹس کے مطابق یہ واضح نہیں کہ مذکورہ شراب کے بیرل قبضے میں لینے کیلئے کارروائی کب اور کہاں کی گئی اور اسے کب کابل نہر میں بہایا گیا لیکن انٹیلی جنس ایجنسی کی جانب سے جاری بیان میں بتایا گیا ہے کہ کارروائی کے دوران 3 ڈیلرز کو حراست میں لیا گیا۔
یہاں یہ امر قابل ذکر ہے کہ مغربی حمایت یافتہ حکومت کے دوران بھی افغانستان میں شراب کی فروخت غیر قانونی تھی مگر طالبان کی جانب سے اس معاملے پر سخت موقف اختیار کرتے ہوئے اقدامات اٹھائے جا رہے ہیں اور 15 اگست کو طالبان کے قبضے کے بعد ملک میں منشیات فروشوں اور منشیات کے عادی افراد کے خلاف کارروائیاں تیز ہو گئی ہیں۔