ملتان: ویسٹ انڈیز کے خلاف دو ٹیسٹ میچز کی سیریز کے پہلے میچ میں پاکستان کی ٹیم پہلی اننگز میں 230 رنز بنا کر آؤٹ ہو گئی۔
ملتان میں جاری ٹیسٹ میچ کے دوسرے روز محمد رضوان اور سعود شکیل نے بلے بازی کا آغاز کیا، تاہم سعود شکیل 84 رنز کی اننگز کھیل کر پویلین لوٹ گئے۔ سلمان آغا محض 2 رنز بنا کر آؤٹ ہو گئے اور نعمان علی بغیر کوئی رن بنائے رن آؤٹ ہو گئے۔ محمد رضوان 71 رنز پر آؤٹ ہوئے۔
ساجد خان 18 اور خرم شہزاد 7 رنز بنا سکے، جس کے بعد پاکستان کی پوری ٹیم 230 رنز پر ڈھیر ہو گئی۔ ویسٹ انڈیز کی طرف سے جیڈن سیلز اور جومل ویریکن نے 3،3 وکٹیں حاصل کیں، کیون نے 2 وکٹیں لیں، جبکہ گوداکش موتی نے ایک کھلاڑی کو آؤٹ کیا۔
پاکستانی ٹیم کی پہلی اننگز میں مشکلات کا سامنا رہا اور ابتدائی بلے بازوں کی جلد آؤٹ ہونے کی وجہ سے پاکستان کی ٹیم 16 رنز پر 4 کھلاڑی گنوا چکی تھی۔ محمد ہریرہ 6 رنز بنا کر کیچ آؤٹ ہوئے، کپتان شان مسعود 11 رنز بنا کر وکٹوں کے پیچھے کیچ دے بیٹھے، کامران غلام 5 رنز بنا کر ایل بی ڈبلیو آؤٹ ہوئے اور بابر اعظم بھی 8 رنز بنا کر آؤٹ ہو گئے۔
قومی ٹیم کی قیادت شان مسعود کر رہے ہیں، جبکہ دیگر کھلاڑیوں میں بابر اعظم، کامران غلام، سعود شکیل، محمد رضوان، سلمان علی آغا، ساجد خان، نعمان علی، خرم شہزاد، ابرار احمد اور محمد ہریرہ شامل ہیں۔ محمد ہریرہ نے ویسٹ انڈیز کے خلاف ہوم گراؤنڈ پر اپنے ٹیسٹ کیریئر کا آغاز کیا۔
تبصرے بند ہیں.