بانی پی ٹی آئی اور بشریٰ بی بی کے 190 ملین پاؤنڈ کیس کا فیصلہ تیسری بار ملتوی

141

اسلام آباد: سابق وزیراعظم عمران خان اور ان کی اہلیہ بشریٰ بی بی کے خلاف 190 ملین پاؤنڈ کی بدعنوانی کے کیس کا فیصلہ ایک بار پھر ملتوی کر دیا گیا ہے۔ احتساب عدالت کے جج ناصر جاوید رانا نے یہ فیصلہ اڈیالہ جیل میں سنانا تھا، مگر دونوں ملزمان عدالت میں پیش نہیں ہوئے، جس کے باعث فیصلہ ایک اور بار مؤخر ہوگیا۔

 

جج ناصر جاوید رانا کا کہنا تھا کہ انہوں نے عمران خان کو دو بار پیغام بھیجا، مگر وہ عدالت نہیں آئے، اور نہ ہی بشریٰ بی بی یا ان کے وکلا کی طرف سے کوئی پیش ہوئے۔ عمران خان کی جانب سے یہ موقف اختیار کیا گیا کہ جب تک ان کی فیملی یا وکلا میں سے کوئی نہیں آتا، وہ عدالت میں پیش نہیں ہوں گے۔

 

جج نے کہا کہ وہ دو گھنٹے سے عدالت میں انتظار کر رہے ہیں، مگر کوئی نہیں آیا۔ اس کے باوجود انہوں نے ملزمان کو ایک اور موقع دیتے ہوئے کیس کا فیصلہ 17 جنوری 2025 کو سنانے کا اعلان کیا ہے۔

 

یاد رہے کہ اس کیس کا فیصلہ پہلے 18 دسمبر 2024 کو محفوظ کیا گیا تھا، جس کے بعد 23 دسمبر 2024، 6 جنوری 2025، اور پھر 13 جنوری 2025 کی تاریخیں مقرر کی گئی تھیں، لیکن اب فیصلہ 17 جنوری کو سنایا جائے گا۔

 

نیب کی جانب سے اس کیس کی تحقیقات میں ایک سال کا وقت لیا اور 35 گواہان کے بیانات ریکارڈ کیے۔ ان گواہان میں اہم شخصیات جیسے سابق وزیراعلیٰ خیبرپختونخوا پرویز خٹک، سابق پرنسپل سیکرٹری اعظم خان اور سابق وفاقی وزیر زبیدہ جلال شامل ہیں۔ اس کیس میں فرد جرم 27 فروری 2024 کو عائد کی گئی تھی، اور نیب نے الزام عائد کیا تھا کہ بانی پی ٹی آئی اور بشریٰ بی بی نے ناجائز طریقے سے رقم حاصل کی۔

تبصرے بند ہیں.