امریکا، کینیڈا اور برطانیہ میں شدید سردی اور برفباری سے زندگی متاثر

واشنگٹن : امریکا، کینیڈا اور برطانیہ میں حالیہ شدید سردی اور برفباری نے زندگی کو مفلوج کر دیا ہے۔ امریکا میں جہاں ایک طرف آگ کی تباہی تھی، وہیں دوسری طرف برفانی طوفان نے جنوبی اور وسطی ریاستوں میں برفباری اور طوفانی بارشوں کے سبب کئی راستوں، پروازوں اور تعلیمی اداروں کو بند کر دیا۔ ٹیکساس، اوکلاہوما اور آرکنساس میں شدید برفباری نے زندگی کو مفلوج کر دیا اور مزید طوفان کی وارننگ جاری کر دی گئی ہے۔

کینیڈا میں بھی سخت سردی اور مہنگائی نے شہریوں کی مشکلات میں اضافہ کر دیا ہے۔ برفباری کے باعث بجلی کی فراہمی متاثر ہوئی اور کئی راستے بند ہوگئے، جس سے دیہی علاقوں سے رابطہ منقطع ہوگیا۔ بس سروس اور پروازیں بھی متاثر ہو گئیں۔

برطانیہ میں بھی سردی نے اپنا پنجہ جما لیا ہے، خاص طور پر شمالی سکاٹ لینڈ کے علاقے ہیملٹ میں درجہ حرارت منفی 18.9 ڈگری تک گر گیا۔ مڈلینڈز اور مشرقی انگلینڈ کے کچھ حصوں میں بھی درجہ حرارت منفی 10 ڈگری تک پہنچا۔ اس شدید سردی کی وجہ سے دفاتر اور اسکول بند ہوگئے ہیں، اور محکمہ موسمیات نے اگلے ہفتے تک سردی کی شدت برقرار رہنے کا امکان ظاہر کیا ہے ۔

ان شدید موسمی حالات نے لاکھوں افراد کو مشکلات میں مبتلا کر دیا ہے، اور حکام امدادی کارروائیاں جاری رکھے ہوئے ہیں۔