مریم نواز ہر دن کے ساتھ مزید مقبول اور طاقتور ہوتی جا رہی ہیں: عظمی بخاری

لاہور:وزیر اطلاعات پنجاب عظمیٰ بخاری نے کہا ہے کہ ملک کے خلاف سازشیں کرنے والوں کو نہ تو معافی ملتی ہے اور نہ ہی این آر او دیا جاتا ہے۔ اپنے بیان میں انہوں نے کہا کہ ایک مخصوص جماعت اور شیطانی سوچ والے شخص نے نوجوانوں کی برین واشنگ کی، جس کے نتیجے میں 9 مئی اور 26 نومبر کی ناکام بغاوتیں ہوئیں۔ عظمیٰ بخاری نے نوجوانوں کو مخاطب کرتے ہوئے کہا کہ انہیں خود فیصلہ کرنا ہے کہ وہ اپنے روشن مستقبل کی طرف قدم بڑھانا چاہتے ہیں یا اقتدار کی ہوس کا ایندھن بننا چاہتے ہیں۔

انہوں نے مزید کہا کہ جو لوگ اقتدار میں بیٹھ کر اپنے حکم کو حرف آخر سمجھتے تھے، آج وہ آئین اور قانون کی باتیں کرتے ہوئے شرم آنی چاہیے۔ عظمیٰ بخاری نے وزیراعلیٰ پنجاب کی تعریف کرتے ہوئے کہا کہ وہ قوم کے بچوں کو الیکٹرک بائیکس اور سکالرشپ فراہم کر کے ان کے روشن مستقبل کے لیے کام کر رہے ہیں، جبکہ مریم نواز طلبہ اور والدین کی دعاؤں کی مستحق ہیں۔

صوبائی وزیر نے یہ بھی کہا کہ مریم نواز کے خلاف 2014 سے مہم چلائی جا رہی ہے، مگر وہ ہر دن کے ساتھ مزید مقبول اور طاقتور ہوتی جا رہی ہیں۔ انہوں نے کہا کہ جو عوام کے ووٹ سے اقتدار میں آتے ہیں، وہ عوام کی فلاح کے لیے کام کرتے ہیں، جبکہ جو چور دروازوں سے اقتدار حاصل کرتے ہیں، وہ قوم کے بچوں کو پٹرول بم اور غلیلیں تھماتے ہیں۔