وفاقی حکومت نے اخراجات میں کمی اور اداروں کی کارکردگی کے لیے رائٹ سائزنگ کا عمل شروع کر دیا، وزیر خزانہ

اسلام آباد: وفاقی وزیر خزانہ محمد اورنگزیب نے اعلان کیا ہے کہ وفاقی حکومت اپنے اخراجات کو کم کرنے اور اداروں کی کارکردگی میں بہتری لانے کے لیے رائٹ سائزنگ کا عمل شروع کر رہی ہے۔

اسلام آباد میں پریس کانفرنس کے دوران وزیر خزانہ نے کہا، "پچھلے چھ ماہ کے دوران ہم نے ملکی معیشت کے استحکام پر بھرپور توجہ مرکوز کی، اور آج ہم ایک مثبت معاشی پوزیشن میں ہیں۔ مائیکرو اکنامک استحکام کا آغاز ہو چکا ہے اور تمام اقتصادی اہداف بہتر سمت میں جا رہے ہیں۔”

انہوں نے مزید کہا، "ہمارا مقصد ملکی معیشت کی ساخت کو برآمدات پر مبنی ترقی کی طرف منتقل کرنا ہے۔ اس کے ساتھ ہی ہم ڈیجیٹلائزیشن اور فیس لیس ٹیکنالوجیز پر بھی کام کر رہے ہیں، اور وزیراعظم کل کراچی میں اس حوالے سے اہم منصوبے کا افتتاح کریں گے۔”

وزیر خزانہ نے وفاقی حکومت کی رائٹ سائزنگ کی ضرورت پر زور دیتے ہوئے کہا، "ہم اخراجات کو کم کرنے اور حکومت کے حجم کو مناسب سطح تک لانے کے لیے رائٹ سائزنگ کر رہے ہیں۔ اس کے ساتھ ساتھ، ہم ٹیکس وصولیوں میں اضافے اور اخراجات میں کمی کے عمل کو آگے بڑھا رہے ہیں تاکہ معیشت کو مستحکم کیا جا سکے۔”

انہوں نے بتایا کہ "جون 2024 میں وزیراعظم نے اخراجات میں کمی کے لیے ایک کمیٹی تشکیل دی تھی، جس کی قیادت مجھے سونپی گئی۔ اس کمیٹی میں ایم این ایز اور ہائی لیول قیادت شامل ہے، اور اس کا مقصد حکومتی اخراجات کو کم کرنا اور اداروں کی کارکردگی کو بہتر بنانا ہے۔”

محمد اورنگزیب نے مزید کہا، "کمیٹی کو 43 وزارتوں اور ماتحت اداروں کے اخراجات کا جائزہ لینے کا اختیار دیا گیا ہے، جن پر وفاقی حکومت کا 900 ارب روپے سے زائد خرچ آ رہا ہے۔ اس عمل کو مرحلہ وار آگے بڑھایا جا رہا ہے، اور ابتدائی طور پر پانچ وزارتوں اور اداروں کا تفصیلی جائزہ لیا جائے گا۔”

انہوں نے اس بات پر بھی زور دیا کہ "تمام وزارتوں اور اداروں کی قیادت سے ان کی کارکردگی کے حوالے سے تفصیلات حاصل کی گئی ہیں، اور ان کی بنیاد پر اخراجات میں کمی اور کارکردگی میں بہتری کے فیصلے کیے جائیں گے۔”

وزیر خزانہ نے اس عزم کا اظہار کیا کہ رائٹ سائزنگ کے اس عمل سے نہ صرف حکومتی اخراجات میں کمی آئے گی بلکہ اداروں کی کارکردگی بھی بہتر ہو گی، جو کہ ملک کی معیشت کی ترقی اور استحکام کے لیے ضروری ہے۔