پنجاب میں شدید دھند، موٹر ویز بند، فلائٹ اور ٹرین آپریشن متاثر

لاہور : پنجاب کے میدانی علاقوں میں شدید دھند نے حد نگاہ کو کم کر دیا ہے، جس کے باعث مختلف موٹر ویز کو بند کر دیا گیا ہے۔ موٹر وے ایم 2 لاہور سے کوٹ مومن، ایم 3 لاہور سے ملتان تک بند ہے، اور ایم 4 پر پنڈی بھٹیاں سے عبدالحکیم تک ٹریفک کا داخلہ ممنوع ہے۔ اس کے علاوہ موٹر وے ایم 11 لاہور سیالکوٹ پر بھی ٹریفک کی انٹری پر پابندی ہے۔ تاہم، ملتان سکھر موٹروے ایم 5 کو دوبارہ کھول دیا گیا ہے۔

دھند کی وجہ سے لاہور، گوجرانوالہ، ملتان، فیصل آباد اور سیالکوٹ سمیت دیگر شہروں میں ٹریفک کی روانی متاثر ہو رہی ہے، جس سے مسافروں کو مشکلات کا سامنا ہے۔ موٹر وے پولیس نے شہریوں کو غیر ضروری سفر سے گریز کرنے اور فوگ لائٹس استعمال کرنے کی ہدایت کی ہے۔

دھند کے سبب لاہور ایئرپورٹ پر فلائٹ آپریشن بھی متاثر ہو چکا ہے اور کئی پروازیں تاخیر کا شکار ہیں۔ ٹرینوں کی آمدورفت بھی تاخیر کا شکار ہے، جس سے مسافروں کو پریشانی ہو رہی ہے۔

لاہور میں گزشتہ روز ہونے والی  بارش کے بعد سردی کی شدت میں اضافہ ہو گیا ہے۔ محکمہ موسمیات کے مطابق لاہور کا کم سے کم درجہ حرارت 7 ڈگری سینٹی گریڈ تک جا سکتا ہے، جبکہ زیادہ سے زیادہ درجہ حرارت 16 ڈگری سینٹی گریڈ تک رہنے کا امکان ہے۔ اس وقت لاہور کا موجودہ درجہ حرارت 9 ڈگری سینٹی گریڈ ریکارڈ کیا گیا ہے۔ آج لاہور میں بارش کے امکانات نہیں ہیں، لیکن ہوا میں نمی کا تناسب 97 فیصد تک پہنچ چکا ہے اور ہوا کی رفتار 5 کلومیٹر فی گھنٹہ ہے۔